Халдвар тээсэн франц иргэнийг Дорноговь аймагт тусгаарлаад байгаа юм. Тэгвэл Дорноговь аймагт нөхцөл байдал ямар байгаа талаар аймгийн Засаг дарга  Г.Энхтүвшин дараах мэдээллийг өгчээ.

-Аймгийн онцгой комисс шөнийн 02:00 цагаас ажиллаж байна. Аймаг руу орох гарах хөдөлгөөнөө өглөөний 06:00 цагаас эхэлж хаасан.  

Улаанбадрах сум нь Дорноговь аймгийн төвөөс 70 км зайд байдаг бөгөөд тухайн компанийн үйл ажиллагаа явуулж буй “Зөөгч овоо”, “Дулаан уул” кэмпүүд дээр 20 хүний бүрэлдэхүүнтэй харуул, хамгаалалтыг гаргаад байна. “Зөөгч овоо”-н дээр 22, “Дулаан уул” дээр 38 хүнийг тусгаарласан бол аймгийн төв дээр 26 хүн, Замын-Үүд дээр хоёр иргэнийг тусгаарласан.  

Мөн франц иргэнтэй хамт вагонд ирсэн 28 иргэнийг ажиглалтад авсан. Өндөржүүлсэн бэлэн байдлыг сайжруулах үүднээс фитнесс, баар, рестораны үйл ажиллагааг хаасан хугацааг сунгасан. Мөн аж ахуйн нэгжүүдэд ариутгал, халдваргүйжүүлэлтийг хийж эхэлсэн.

Халдвар тээсэн франц иргэн монгол руу 03-р сарын 02-нд нэвтрэхдээ “Улаанбаатар хотод ажиллана” гэж асуумжаа бөглөжээ. Гэвч тэрээр асуумжаасаа зөрж Дорноговь руу явжээ. Тиймээс холбогдох газарт хандаж хариуцлага тооцуулна гэдгээ Дорноговь аймгийн засаг дарга Г.Энхтүвшин мэдэгдлээ.

---