БНСУ-д өнгөрсөн шөнө Ковид-19 коронавирусээр халдварлагсдын тоо 600-р нэмэгдэж 4,812 тохиолдол бүртгэгдэж, 28 хүн нас барсан байна. Өдөр хоногт хэдэн зуугаар халдварын тохиолдол нэмэгдэж буй шинэ төрлийн коронавирус солонгосчуудын өдөр тутмын амьдралын хэмнэлийг хэрхэн өөрчилснийг Korea Times нийтэлжээ.

Энэ долоо хоногт танилцуулсан цахим судалгаагаар коронавирусийн халдвар Өмнөд Солонгосын уугуул иргэд болоод гадны иргэдийн өдөр тутмын амьдралд нөлөөлж байгаа ба амны хаалтын хомсдол үүсч, нийгмийн сэтгэлзүй тогтворгүйтсэн болохыг харуулсан байна. Судалгаагаар иргэд олон нийтийн болон олон хүн цугласан газруудаар явахаас зайлсхийж гэртээ байхыг илүүд үзэх болжээ.

Судалгаанд оролцсон гадны иргэд болоод уугуул оршин суугчдын 70 орчим хувь нь вирусийн тархалт нэмэгдсэнээс хойш ажлын байрны орчин нөхцөл өөрчлөгдсөн гэжээ. Мөн судалгаанд оролцогчдын 68-69 хувь нь амны хаалт зүүж, гар ариутгагч ашиглаж эхэлсэн байна.

Харин гадагш гаралгүй гэртээ байх үедээ солонгосчууд  зурагт үзэж цагийг өнгөрөөж байгаа бол гадны ажилчид ном уншиж цагийг өнгөрөөж байна хэмээн хариулжээ. Гадны иргэд вирусийн халдвар гарснаас хойш гэр бүлийнхэнтэйгээ цагийг хамт өнгөрөөх болсон хэмээн 64 хувь нь хариулсан бол солонгосчууд хамаагүй бага буюу 18 хувь нь л гэр бүлтэйгээ хамт байх болсон гэжээ.

Цахим худалдаа эрс нэмэгдсэн бөгөөд судалгаанд оролцсон Солонгосын уугуул оршин суугчдын 84 хувь нь гэрээсээ гаралгүй цахимаар хүнсний болоод хэрэглээний бараа бүтээгдэхүүн худалдаж авахыг илүүд үзэх болсон байна.  

Эх сурвалж: Korea Times

---