ЭМЯ-наас COVID-19 вирусийн халдварын нөхцөл байдлын мэдээ /2020.02.28ны 11:00 цаг/

Дэлхийн таван тивийн 48 оронд коронавирусийн өвчлөл бүртгэгдээд байна. Тухайлбал Грек, Норвеги, Пакистан, Бразил, Эстон зэрэг есөн оронд шинэ халдварын шинэ тохиолдол бүртгэгдээд байна.

Европын оронд бүртгэгдэж байгаа тохиолдлуудын ихэнх нь эх уурхай нь тодорхойгүй, аялсан хүнтэй хавьтал болоогүй гэх зэрэг өгүүлэмжтэй байгаа. Манай улсад өнөөдрийн байдлаар шинэ коронавирусийн халдварын тохиолдол бүртгэгдээгүй байгаа ч сэжигтэй тохиолдлуудыг ажиглалтад авсан байгаа. Энэ хугацаанд 690 хүнийг ажиглалтад авсан одоогийн байдлаар 302 хүнийг ажиглалтад авч биеийн байдлыг хянаж байна.

Манайд оронд коронавирус бүртгэгдээгүй гэж бодох нь том алдаа болно

Дэлхийн эрүүл мэндийн байгууллагын мэргэжилтэн О.Ариунтуяа:

Хоёрдугаар сарын 28-ны 09:00 цагийн байдлаар БНХАУ-д  327 шинэ тохиолдол бүртгэгдсэнээр нийт тохиолдлын тоо 78,894 болсон. БНХАУ-аас гадна 3,664 тохиолдол батлагдаж, 56 нь нас барсан байна.

COVID-19 халдварын тоо Иранд 248, Италид 650 болж, Японы хөлөг онгоцонд тусгаарлагдсан хүмүүсээс 705 хүн халдварлагдсан.

БНСУ-д 256 тохиолдол шинээр бүртгэгдэж нийт тохиолдлын тоо 2,022 болж, 13 хүн нас барсан. 

ДЭМБ-ын Ерөнхий захирал хэлэхдээ "Бид шийдвэрлэх мөчид ирээд байна. Халдвар тархсан орнуудыг хурдан хугацаанд хариу арга хэмжээ авахыг уриалж байна. Энэ бол томуугийн вирус биш учраас, тархалтыг хязгаарлах боломжтой. Хоёр 7 хоногийн хугацаанд шинээр тохиолдол бүртгэгдээгүй олон улс байна. Гэхдээ хэд хоногийн дараагаас нэмэгдсэн тохиолдол ч гарсан. Ямар ч орон манайд вирус бүртгэгдэхгүй гэж бодож болохгүй. Ингэвэл том алдаа болно. Вирус бол улс орны хязгаар, яс үндэс, хөгжлийн түвшнийг ялгахгүй. Улс орон бүр вирусийг оруулахгүй байх, орж ирсэн нөхцөлд авах арга хэмжээгээ мэдэж байх ёстой" гэдгийг онцлон тэмдэглэсэн.

ХӨСҮТ-д ДЭМБ-аас Ази, Номхон далайн орнуудтай хийдэг долоо хоног бүр хийдэг видео хурал болно. Үүнд улс орнуудын Эрүүл мэндийн сайд нар оролцох бөгөөд манай улсаас Эрүүл мэндийн сайд Д.Сарангэрэл энэхүү хуралд оролцох юм.

Жирэмсэн, гачигдал гарсан, эрүүл мэндийн яаралтай тусламж авах шаардлагатай иргэдийг нэвтрүүлж байгаа 

ОБЕГ-ын хэлтсийн дарга, дэд хурандаа Д.Хонгор: 

Covid-19 эрчимтэй тархаж байгаатай холбогдуулан Улсын онцгой комиссын хуралдаан болж, тушаал гаргасан. Нийслэлээс орох, гарах хөдөлгөөний хязгаарласантай холбоотойгоор хүндэтгэн үзэх шалтгаантай иргэдийг нэвтрүүлж байгаа. Тодруулбал, жирэмсэн, гачигдал гарсан, эрүүл мэндийн яаралтай тусламж авах шаардлагатай иргэдээс бусад тохиолдолд нэвтрүүлэхгүй байгаа. Мөн БНСУ, Япон улстай хийх нислэгүүдийг цуцлах шийдвэр гаргасан. Түүнээс гадна Улаанбаатар-Эрхүү, Улан-Үүд, Берлин зэрэг улсуудын нислэгүүдийг хэрхэх талаар Зам тээврийн хөгжлийн яамны ажлын хэсэг ажиллаж байна.

Голомттой бүс нутгаас бусад улсаар дамжин ирсэн иргэдийг 14 хоног дөрвөн эмнэлэгт хуваарилан тусгаарлаж байгаа. Эдгээр иргэд гарах зардлыг өөрсдөө төлөхөөр тусгагдсан байгаа.

Өнөөдрийн байдлаар Бусан-Улаанбаатар чиглэл 17, БНХАУ-д айлчилсан 11, бусад 13 гээд нийт 41 иргэнийг тусгаарласан бөгөөд эдгээр иргэдийн биеийн байдал хэвийн байна.

Орхон, Налайх дүүрэгт тусгаарлагдсан дөрвөн иргэний шинжилгээний хариу сөрөг гарсан 

ХӨСҮТ-ийн захирал Д.Нямхүү: 

Нийт сэжигтэй 5 тохиолдлын шинжилгээг хийн, тусгаарлаад байна.

• ХӨСҮТ-д 27 хүн
• Цэргийн төв эмнэлэгт 74
• Жаргалант суманд 14
• Сэлэнгэ аймагт 12 гээд нийт 124 хүнийг ажиглан тусгаарлаад байна.

Өнөөдрийн байдлаар Орхон, Налайх дүүрэгт тусгаарлагдсан дөрвөн иргэний шинжилгээний хариу сөрөг буюу халдваргүй гэж харсан.  Мөн Япон улсаас 2000 оношлуурыг хүлээн авч, ажиллаж байна.

Иргэдийн зүгээс тусгаарлах, ажиглах хоёр өөр зүйл гэдгийг ойлгох хэрэгтэй байна. Тусгаарлалтад вирусийн голомтоос ирсэн, сэжигтэй тохиолдол илэрсэн тохиолдолд шууд тусгаарлах арга хэмжээ авна. Харин ажиглалтад авсан гэдэг нь Солонгос, Итали, Япон зэрэг орноор транзит хийж ирсэн иргэдийг ажиглалтад авч, өдөр бүр тестелж, эмнэлзүйн бусад шинж тэмдэг илэрч байгаа эсэхийг ажиглана гэсэн үг. Хэрэв аль нэг шинж тэмдэг илэрвэл ХӨСҮТ-д тусгаарлах арга хэмжээ авна гэдгийг тодотгов.

Оношлуурыг туршилтаар баталжээ 

Япон Улсад үйлдвэрлэгдсэн оношлуураар шинэ коронавирусын халдварыг илрүүлэх оношилгоог Монгол Улсад хийж байгаа ба өнөөдрийг хүртэл сэжиглэгдсэн 300 гаруй тохиолдолд тус оношлуурыг ашиглаж, Монгол Улсад шинэ коронавирусын халдвартай хүн гараагүй сайхан мэдээтэй байна.

Дэлхий даяар маш хурдацтай тархаж, 40 гаруй оронд халдвар тээгч илрээд байгаа энэ үед тус өвчний халдварын голомт БНХАУ-тай 4700 км хуурай газраар хиллэдэг Монгол улсад шинэ коронавирусын халдвар ороогүй гэдэгт эргэлзэж байна. Монголчууд илрүүлж чадахгүй байгаа юм биш үү гэсэн эргэлзээ иргэдийн дунд ам дамжин яригдаж байгаа нь нууц биш зүйл.

Иймд эрүүл мэндийн салбарынхан оношлуурын үр дүнг туршилтаар шалгасан байна. Тодруулвал амьсгалын замын цочмог халдварын 60 тохиолдолд шинэ коронавирусын оношилгоог тус багажаар давхар хийсэн байна. Ингэхдээ түүврийн аргаар шатлалын эмнэлгүүдэд эмчлүүлж байгаа хүнд, хөнгөн өвчтнүүдэд оношилгоог хийхэд шинэ коронавирусын халдвар илрээгүй байна. Тиймээс оношлуур үнэн зөв хийгдэж байна гэж ЭМ-ийн сайд Д.Сарангэрэл мэдэгдэж байна. 

---