Өчигдөр/2020.02.11/-өөс эхэлж орсон цас өнөөдөр Завхан, Хөвсгөл, Булган, Архангай, Төв аймгийн нутгуудаар орж байна. Зарим газар цасан шуурга шуурч малчдын мал, хуй шуурганд уруудах хэмжээнд хүрчээ.

Тухайлбал, Төв аймгийн Заамар суманд өглөө 06:00 цагаас орж эхэлсэн цас шуурч улмаар 7 айлын 3900 гаруй мал шуурганд уруудаж алга болжээ.

Сумын засаг даргаар ахлуулсан засаг даргын тамгын газрын 20 гаруй хүний бүрэлдэхүүнтэй баг эрэл, хайгуул хийн ажиллаж байна. Өглөөнөөс хойш ажилласны эцэст 5 айлын малыг олж, суурин газар, айлын хошоо хороо бараадуулжээ.

Одоогоор хоёр айлын 700 гаруй малыг хайх ажил үргэлжилж байгаа гэх мэдээллийг бид Заамар сумын засаг дарга Л.Амгаланбаяртай утсаар холбогдож авлаа. 

Мөн цасан шуурганд 10 настай хүү малтайгаа, нохойтойгоо хамт уруудсан ч азаар нохой нь хүүг дагуулан гэртээ ирсэн гэх мэдээллийг өглөө. Цаашид ч цасан шуурга үргэлжлэх төлөвтэй байгаа тул сэрэмжлүүлэг гаргажээ. 

Сэрэмжлүүлэг:

-Өнөөдөр цасан болон шороон шуурга үргэлжлэх төлөвтэй байгаа тул иргэд та бүхэн малаа бэлчээрт гаргахгүй байх, мөн хот хооронд зорчихгүй байх, цаг агаарын нөхцөл байдлаас шалтгаалан осол гэмтэл гарах нөхцөл бүрдээд байгаа тул иргэд, малчид та бүхэн болгоомжтой байхыг анхааруулж байна.

Төв аймгийн Заамар сумын Засаг даргын тамгын газар

---