"Босоо хөх монгол" бүлгэмээс өчигдөр Замын-Үүдийн боомтоор 60 хятад иргэн ирсэн гэсэн мэдээллийг авчээ. Тус мэдээллийн дагуу "Босоо хөх монгол- бүлгэмийн Замын-Үүд дэх салбар зөвлөл тэдгээр иргэдийг хэрхэн тусгаарлаж, шалгаж байгаа талаар ажиглалтыг хийсэн байна.

Тэдгээр иргэдийн 24 иргэн нь Замын-Үүд дээр бууж үлдсэн бол үлдсэн 36 хятад иргэн галт тэргээр Улаабаатар хотод иржээ. Хараа хяналт, шалтгалт тун хангалтгүй, хятад иргэдийг шууд нэвтрүүлж байгаа нь өвчин тархах эрсдэл үүсэх вий гэх үүднээс энэхүү ажиглалтыг хийсэн гэдгээ тус бүлгэмээс хэлж байна.

Арван иргэн Амгалан өртөөнд бууж 20 гаруй хятад иргэн УБТЗ-ын төв вокзалд өглөө буусан байна. Төмөр замын галт тэргээр ирж байгаа иргэдийн халууныг шалгаад гаргаж байгаа нь учир дутагдалтай байна гэж "Босоо хөх монгол" бүлгэмээс мэдээлэв.

Тэд "Хилээр нэвтрэн орж ирж байгаа хятад иргэдийг оруулж ирэхээ болиулах хэрэгтэй. Нэг сая таван зуун мянган иргэний эрүүл мэндэнд эрсдэл учирч байна. Эрүүл мэндийн сайд Д.Сарангэрэл галт тэргэний буудал дээр очиж хяналт шалгалтыг хэрхэн хийж байгааг өөрийн биээр ирж шалгах ажиллах хэрэгтэй" гэж үзэж байна. 

Харин МХЕГ-ын улсын ахлах байцаагч Т.Төмөрбаатар өдрийн сонины сэтгүүлчдийн асуултад "Хил дээр 450 байцаагч ажиллаж байгаагийн 100 гаруй нь эрүүл ахуйн байцаагч. Хил дээр иргэдийн халууныг үзэж, 14 асуулттай асуумж авч, хоёроос дээш шинж тэмдэг илэрвэл тусгаарлаж, шаардлагатай тохиолдолд эмнэлгийн байгууллагад хандаж байгаа" хэмээн хэлснийг сануулъя. 

---