Корона вирустэй холбоотойгоор "Хүчит шонхор" захын хөл хөдөлгөөн ихэссэнээс нэг урсгалтай болголоо гэсэн мэдээллийг ТЦА-наас өгсөн. Бид байдлыг газар дээрээс нь сурвалжилж байна. 

"Хүчит шонхор" худалдааны төв энэ сарын 28-ны өдрийн 11 цагийн байдлаар хөл хөдөлгөөн ихтэй байна. Тээврийн цагдаагийн албанаас автомашины хөдөлгөөн их байгаа тул Дэнжийн 1000 уулзвараас Нарантуул-2 хүртэл урдаасаа хойшоо нэг чиглэлд оруулсан байна. Харин хойноосоо ирж байгаа автомашинууд Нарантуул-2 урдуур эргэн Судал төвөөсөө 17 руу орохоор зохицуулжээ.

"Хүчит шонхор" худалдааны төвд үхрийн цул мах 11000 төгрөг, хонины мах 7000-7700 төгрөгийн хооронд байна. Харин иргэдийн ярьж буйгаар гурил, будааны үнэ нэлээн нэмэгдсэн байна гэлээ.

Улаанбаатарын 10 кг гурилыг 13000, 5 кг цагаан будаа 22000 төгрөгөөр зарж байна. Харин хүнсний ногооны үнэд өөрчлөлт ороогүй хэмээн худалдаачид дурдав. Махны үнэ 200-500 төгрөг нэмэгдсэн нь махны нийлүүлэлт муугаас болсон хэмээн худалдаачид дурдсан бөгөөд тэрнээс бол хүнсний эрэлт хэрэгцээ ихссэн гэх сургаар үнээ нэмээгүй хэмээн тайлбарлав.

---