Домогт сагсанбөмбөгчин Коби Брайнт өнгөрсөн ням гарагт 13 настай охин Жианнагийн хамт нисдэг тэрэгний ослоор харамсалтайгаар амиа алдсан билээ. Эх сурвалжуудын мэдээлснээр ослын шалтгаан тодорхой болоогүй, мөрдөн шалгах ажил Холбооны мөрдөх товчооны ажилчдын тусламжтай үргэлжилж байна.

Харин Кобигийн үнэнч шүтэн бишрэгчид, сагсанбөмбөгт дурлагчид дэлхийн өнцөг булан бүрт эмгэнэл илэрхийлсээр байгаа юм. Тэд Америкийн сагсанбөмбөгийн түүхэнд домог болон мандсан хар мамбагийн дүрийг NBA-ын логонд мөнхлөн үлдээж, үеийн үед дурсгалыг нь хүндэтгэх хүсэлтэй гэдгээ илэрхийлжээ.

Уг хүсэлтэд хэдий нь 800,000 гаруй хүн гарын үсгээ зурсан байна. Одоо байгаа NBA-ын логоны загварыг Алан Сигель зохиосон ба логон дээр байгаа сүүдэрлэсэн дүрсний эзэн Лос Анжелес Лейкерс багийн түүхэн дэх агуу тоглогчдын нэг байсан ерөнхий менежер, өдгөө 81 настай Жерри Уэст юм.

Change.org цахим хуудсаар дамжуулан Nick M хаягнаас уг хүсэлтийг санаачлан, 41 насандаа ослоор амиа алдсан Брайнтын дүрийг Америкийн үндэсний сагсанбөмбөгийн холбооны логонд үүрд мөнхлөх хүсэлтэй нь гарын үсэг зурахыг уриалжээ. Саналыг дэмжигчид логонд байршуулж болох Брайнтын сүүдэрлэсэн дүрийг өөр өөрийнхөөрөө зурж цахим орчинд хуваалцсан байна.

Эх сурвалж: The BBC

---