АНУ-ын Сенатын танхимд энэ долоо хоногт Ерөнхийлөгч Дональд Трампыг огцруулах эсэхээр санал хураалт, сонсгол, шүүлт, хэлэлцүүлэг явуулж байгаа. Гэвч төрийн тэргүүний ирээдүйг шийдэх чухал шүүлтийн үеэр Сенатын гишүүдийн зарим нь нойрмоглон унтаж, нэг хэсэг нь тоглоом тоглож, үлдсэн нь бохь зажлан тоомжиргүй хандаж байгааг гадны хэвлэлүүд онцолжээ.

Бүгд Найрамдах намын гишүүд Жим Риш, Жим Инхоф нар урт удаан хугацаанд үргэлжилсэн сонсгол, хурлын үеэр зүүрмэглэж буй гишүүдийн тоонд багтсан байна. Хийх юмаа олж ядан, хуралд үл анхаарсан бусад гишүүд үгийн сүлжээ бөглөх, тоглоом наадгай тоглож цагийг нөхцөөсөн бол зарим нь цаасаар онгоц хийн дэггүйтжээ.

АНУ-ын Ерөнхийлөгч Дональд Трампыг ардчиллын эсрэг эрх мэдлээ урвуулан ашигласан хэрэгт холбон буруутгаж байгаа юм. Ардчилсан намынхан олонхийн суудал эзэлсэн Төлөөлөгчдийн танхимд Трампыг гэм буруутай гэж үзсэн бол Бүгд Найрамдахчууд олонхийн суудалтай Сенатын танхимын шүүлтийг амжилттай даван гарна гэдэгтээ итгэлтэй байгаагаа тэрбээр илэрхийлж байсан.

Reuters агентлагийн мэдээнд дурдсанаар Сенатын танхимын шүүлтийн үеэр Ардчилсан намын ес, Бүгд Найрамдах намын 20 гаруй гишүүн хурлыг орхиж гарсан байна. Уг нь Сенатын сонсголын үеэр гишүүдийг гар утас, лэптоп, таблетууд ашиглахыг зөвшөөрдөг ч энэ удаад тусгай сонсгол явуулж байгаа тул тэдгээрийг бүрэн хоригложээ.

Эх сурвалж: The BBC

---