Хятадын Ухань хотоос гаралтай коронавирус дэлхийн хэд хэдэн улсад илэрч, халдвар авсан иргэдийн тоо нэмэгдэхийн сацуу цагаан сарын баяр тохиож байгаа тул хотын нийтийн тээврийн хэрэгслийг зогсоож, тусгаарласан талаар эх сурвалжууд дамжуулжээ. Эндэхийн есөн сая гаруй иргэн хотыг орхин гарах боломжгүй болж байна.

Нийтийн тээврийн хэрэгслүүд цагаан сарын их нүүдэл дуусах хүртэл буюу долоо хоногийн хугацаанд ажиллахгүй гэжээ. Одоогоор Уханий коронавирус хэмээн нэрлэгдээд байгаа уушгины цочмог халдварт хатгалгаа өвчнөөр 17 хүн амиа алдаж, 500 гаруй хүн өвчилсөн нь тогтоогдоод байна.

Хятадын эрх баригчдын гаргасан шийдвэрээр өнөөдрөөс эхлэн Ухань хотын зорчигч тээврийн галт тэрэг, нисэх онгоцны үйлчилгээг бүрэн зогсоож байна. Мөн орон нутгийн цагаар өглөөний 10:00 цагаас автобус, усан онгоц, метроны үйл ажиллагааг ч хорьжээ. Хотын оршин суугчдыг олон нийтийн газраар зорчихгүй байхыг анхааруулж, нийтийн уулзалт арга хэмжээг багасгасан байна.

Аялагч жуулчдын хөл хөдөлгөөн ихтэй зочид буудлууд, үзвэр үйлчилгээний газруудад түр хугацаанд хориг тавьж, номын сан, музей, театруудын үүд хаалгыг барьжээ. Ухань хотын Гуйюань сүмд жил бүр цагаан сарын баяраар болдог 700,000 хүн цугладаг арга хэмжээг энэ жил мөн цуцалсан байна.

Олон улсад уг вирусыг 2019-nCoV гэж нэрлээд байгаа юм. Урьд өмнө хүнд халдсан тохиолдол илэрч байгаагүй. Амиа алдсан иргэд Ухань хотын орчимд Хубей мужийн оршин суугчид байна. Коронавирусын халдвар хурдацтай тархаж Тайланд, Өмнөд Солонгос, Япон, Америк зэрэг улсуудад илэрсний дараа Дэлхийн эрүүл мэндийн байгууллага Женев хотод шуурхай хуралдсан. Хурлаар одоохондоо дэлхий нийтэд онц байдал зарлах шаардлагагүй гэж үзсэн байна. Халдварын тархах арга замыг дахин шинжилж өнөөдөр шуурхай хуралдаан үргэлжлэх ажээ.

Урьд өмнө Зика болон Эбола вирусын тархалтын үед Дэлхийн эрүүл мэндийн байгууллага өндөр түвшний аюулын дохио асааж, онц байдал зарлаж байсан юм.

Эх сурвалж: The BBC

---