УИХ-ын Ёс зүйн дэд хороо өчигдөр хуралдаж нэр бүхий гишүүд үндэслэлгүйгээр хөрөнгөжсөн асуудлыг хэлэлцлээ. Энэ талаар Ёс зүйн дэд хорооны дарга Б.Бат-Эрдэнэ мэдээлэл өгөв.

Тэрбээр “Бид уучлахгүй хөдөлгөөнөөс хөрөнгө орлого нь үндэслэлгүйгээр нэмэгдсэн УИХ-ын гишүүн Ж.Мөнхбат, Л.Болд, М.Оюунчимэг нарыг шалгах хүсэлтийг УИХ-ын Ёс зүйн дэд хороонд тавьсан. Үүнийг бид дүрмийн дагуу шалгаж, Ёс зүйн дэд хороогоор хэлэлцүүллээ. Горимын саналаар хаалттай хуралдсан. Дэгийн дагуу асуудлаа хэлэлцэж, хөрөнгө орлого нь үндэслэлгүй нэмэгдсэн гишүүдээс албан ёсны тайлбар авсан. Ёс зүйн дүрмийг хэлэлцээд техникийн алдаа гарсан гэж үзлээ.

Тиймээс нэр бүхий гишүүдэд зөвлөмж хүргүүлэхээр боллоо. Төрийн бус байгууллага байгуулсан, компани байгуулаад үйл ажиллагаа нь эхлээгүй, бүртгүүлээгүйгээс болж техникийн алдаа гардаг. Гишүүд ч үндэслэлгүйгээр хөрөнгө нь нэмэгдээгүй гэдгээ мэдэгдсэн. Хөрөнгө орлогын мэдүүлгийг ил тод болгохдоо зөвхөн тоон үзүүлэлт гаргадаг. Тайлбар нь байдаггүй учраас ийм асуудал үүсжээ. Цаашдаа төрийн алба хаагчдын хөрөнгө орлогын мэдүүлэгтэй холбоотой хуулийн арга хэмжээг авч ажиллана” гэв.

---