Хан-Уул дүүргийн 15-р хорооны нутаг дэвсгэрт байрлах “Тод Каннам” эмнэлэгт 2019 оны гуравдугаар сарын 26-ны өдөр гоо сайхны хагалгаанд орсон 29 настай эмэгтэй амь насаа алдсан хэрэг гарсан билээ.

Тэгвэл энэ сарын 13-нд "Тод Каннам" гоо сайхны нэгдсэн эмнэлгийн дарга, Ерөнхий эмч Д.Тодномбат болон сувилагч Б.Мөнгөнчимэг нарт холбогдуулан Эрүүгийн хуулийн тусгай ангийн 10.6 дугаар зүйлийн 1 дэх хэсэгт зааснаар яллах дүгнэлт үйлдэж шүүхэд шилжүүлсэн юм. Харин хэргийг шалгах явцад тус эмнэлгийн эмч, сувилагчийг буруутайд тооцон шүүхэд шилжүүлжээ.

Тэгвэл уг хэргийн талаар амиа алдсан бүсгүйн ар гэрийнхэн болох аав С.Гүндсамбуу, ээж Д.Аюуш нар өнөөдөр хэвлэлд хандсан юм. Тэд, 

-Хэрэгт "Тод Каннам" эмнэлгийн нэг эмч, нэг сувилагчийг татсанд гомдолтой байна. Уг хэрэгт тус эмнэлэг хариуцлага үүрэхгүй үлдэх гэж байна. Охиноо алдсанаас хойш тус эмнэлгээс манай ар гэрийнхэнд эмгэнэл илэрхийлээгүй. Бид тус эмнэлгийн захирал, эмнэлгийг хэрэгт холбогдуулах нь зүйтэй гэж үзэж байгаа гэв.

Өмгөөлөгч Л.Баасанжав: -Амиа алдсан бүсгүй "Тод Каннам" эмнэлэгт итгэж хандсан болохоос биш тухайн эмч, сувилагч нарт хандаагүй. Иймээс тус эмнэлгийн захирал Д.Тоднямыг заавал хариуцлага хүлээх ёстой гэж үзэж байна гэлээ.

Тус эмнэлгийн эмч, сувилагч нарт холбогдох хэргийг Хан-Уул дүүргийн эрүүгийн хэргийн анхан шатны шүүх 2020 оны 1 дүгээр сарын 13-ны өдрийн урьдчилсан хэлэлцүүлгээр хянан хэлэлцээд, яллагдагч нарыг шүүхэд шилжүүлж шүүх хуралдааныг энэ сарын 27-ны өдрийн 12 цагт товлосон байна.

---