АНУ-ын Ерөнхийлөгч Дональд Трампад итгэл үзүүлэх эсэх санал хураалт өнгөрсөн оны сүүлчээр Төлөөлөгчдийн танхимд явагдсан ч Ардчилсан намын гишүүд дийлэнхийн суудал эзэлдэг болоод ч тэр үү түүнийг гэм буруутай гэж үзсэн. Ингэснээр тус улсын түүхэнд Төлөөлөгчдийн танхимын шүүлтэд бүдэрсэн гурав дахь төрийн тэргүүн болсон билээ.

Шинэ он гарангуут Бүгд Найрамдах намын гишүүд дийлэнх суудал эзэлдэг Сенатын танхимд Трампыг шүүнэ хэмээн мэдэгдэж байсны дагуу орон нутгийн цагаар пүрэв гарагт АНУ-ын Сенатын танхимын 100 хууль тогтоогч хэргийг шударга шүүхээр тангараг өргөлөө. Дээд шүүхийн ахлах шүүгч Жон Робертсын өмнө Сенатын гишүүд шударга ёсны ам тангараг өгсөн байна. Зарим эх сурвалжид уг явдлыг түүхэн хэмээн онцолжээ.

Сенатад Трампыг шүүх хурал энэ сарын 21-ний өдөр албан ёсоор эхэлнэ. Тиймээс ойрын долоо хоногуудад АНУ-ын Ерөнхийлөгч албан тушаалдаа үлдэж чадах эсэхийг шийдэх юм. Түүнийг эрх мэдлээ урвуулан ашигласан, Конгресст хууль бусаар нөлөөлж хаалт тавьсан зэрэг хэргүүдэд буруутгаж байгаа. Ажиглагчдын зүгээс Сенатын танхимд Бүгд Найрамдахчууд дийлэнхийн суудалтай учир Трамп шүүлтийг амжилттай даван гарна гэж таамаглаж байна.

Эх сурвалж: The BBC

---