Говь-Алтай аймагт Засагт ханы зартай "сайн эр" "Цахиур Төмөр"-ийн хөшөөг Алтай хотоос 15 км-т, зам дагуу "Баян үзүүр" хэмээх газар босгож эхэлжээ.

20-р зууны үеийн засаг захиргааны нэгжийн хуваарилалтаар одоогийн Говь-Алтай аймаг Засагт хан аймагт харьяалагддаг байсан билээ. Тиймдээ ч тухайн үеийн Засагт хан аймгаас гаралтай "сайн эр" буюу малын хулгайч "Цахиур Төмөр"-т зориулсан хөшөөг Говь-Алтайчууд ийн босгожээ. Хөшөөний ажлын явц 80 хувьтай байгаа бөгөөд хөшөөг урлах ажил 2020 оны 5 дугаар сард бүрэн дуусах юм ажээ.

Харин үүнийг зарим иргэд эгдүүцэн, "хулгайчид зориулсан хөшөө босголоо" хэмээн хүлээж авч байна. Тухайлбал, нэгэн жиргээч өөрийн цахим хуудастаа: 

"Орсууд "Дөлгөөн Дон" роман дээр гардаг эхнэр, нөхрөө араар нь тавьдаг садар самуун эр, эм хоёр/Григорий Мелехов, Аксинья Астахова/-оо хөшөөнд мөнхөлчихсөн. Манайхан "Тунгалаг Тамир"-ын малын хулгайчаа бас хөшөөнд мөнхөлчихлөө. Юундаа ч дутахав. Тунгалаг Тамирыг "Дөлгөөн Дон"-оос санаа авч бичсэн гэдэг биз дээ. Хөшөө ч гэсэн адил биз" хэмээжээ. 

---