Японы мэргэжлийн сумо бөхийн шинэ оны хамгийн эхний Хацу башё эхний өдрөөсөө тун сонирхолтой өрнөж байна.
Хоёр өдрийн дараах байдлаар нэг ч унаагүй Ёкозүна, Озеки, Комүсүби цолтон үлдсэнгүй. Маэгашираг тэргүүлэн барилдаж буй Эндо эхний өдөр Какүрюү М.Ананд аваргыг давсан бол хоёр дахь өдөр буюу өчигдөр их аварга Хакухо М.Даваажаргал аваргыг давж шуугиан тарилаа.
Эндо гэж хэн бэ?
Ойтеказе дэвжээний бөх Шота Эндо нь энэ жил 30 настай бөгөөд мэргэжлийн сумо бөхөөр барилдсан анхны жилээ буюу 2013 оны Нагояа башёд жүрёо зиндаанд түрүүлж байсан удаатай. Улмаар 2018 оны Нацу башёд комүсүби цолтойгоор барилдсан ч гэмтлийн улмаас башёг дундаас нь өнжиж цолоо хураалгаж байлаа. Тэрээр өнгөрсөн оны Аки башёгоос комүсүби цолоо дахин эргүүлэн авсан ч оны төгсгөлийн кюушюу башёд 50 хувийн амжилтаа үзүүлж чадалгүй цолоо хураалгасан юм.
Эндо 2014 оноос хойш их аварга Хакухотой 13 удаа учраа тааран барилдахдаа 2016 онд их аваргыг нэг удаа давж байсан бол Какүрюү М.Ананд аваргатай 15 удаа учраа таарахдаа 2014, 2018 онуудад тус тус нэг удаа давж үзсэн байдаг.
