Монголбанкны Ерөнхийлөгч асан Н.Золжаргал 2013-2016 оны хооронд төрсөн ах Н.Жаргалсайхан болон түүний хүү, охины нэрээр Австри улс руу их хэмжээний ам.доллар шилжүүлсэн. Шилжүүлсэн 650 мянган ам.долларыг эхнэр нь хүлээн авч, тус улсад үл хөдлөх хөрөнгө худалдан авсан баримтыг шүүхийн зөвшөөрлөөр Австрийн прокурорын газраас Монгол улсын АТГ-т нь ирүүлээд байгаа билээ.

Н.Золжаргал энэхүү үл хөдлөхийнхөө тухай “Монголбанкны Ерөнхийлөгчөөр ажиллаж байх үед энэ мөнгө шилжсэн болохоос би тэр мөнгийг бизнес хийж олсон байсан” хэмээн мэдүүлдэг юм.

Н.Золжаргалд үүнээс гадна арилжааны банканд  бага хүүтэй зээл олгосон, “Эрдэнэт үйлдвэр”-ийн 49 хувийг худалдан авахад Монголбанкнаас баталгаа гаргасан гэх хоёр хэрэгт давхар шалгаж байгаа.

Хууль зүй, дотоод хэргийн сайд Ц.Нямдорж "Эрдэнэт үйлдвэрийн 49 хувийг худалдаж авахдаа Монголбанкнаас 100 тэрбум төгрөгийг хувийн компани руу шилжүүлсэн.  Монголбанкны хуулиар Засгийн газар болон банканд зээл өгдөг. Гэтэл хувийн компанид зээл олгосон асуудлыг Прокурор нэг жил хав дараад байна. Прокурорын байгууллагад асуудал их байна шүү" хэмээж байсан билээ.

Баттай эх сурвалжийн авсан мэдээллээр түүнд оноосон хэргүүд, тухайлбал Австрид үл хөдлөх хөрөнгө худалдаж авсан хэрэг нь Хөөн хэлэлцэх хугацаагаар дуусаж байгаа, үлдсэн хэрэг нь цагийн явцад үгүй болж, Н.Золжаргал цагаадна гэлээ.

---