Иран улсын хувьсгалт гвардын генерал Касем Сулейманийн аллагын хариуг авч Иракийн Аль-Асад, Эрбилд байрласан АНУ-ын нисэх хүчний хоёр бааз руу 10 гаруй пуужин харвасны дараа газрын тосны үнэ огцом өссөн талаар эх сурвалжууд мэдээлжээ.

АНУ-д түүхий нефтийн үнэ орон нутгийн цагаар мягмар гарагийн орой 4 хувиар өсч нэг баррель түүхий нефт 65,48 ам.долларт хүрсэн байна. Ираны Засгийн газар Америкийн баазууд руу галласан тухай мэдээ дамжуулахаас өмнө нэг баррель нь 62,70 ам.доллар байжээ.

Хөрөнгө оруулагчид Иран-Америкийн зөрчил мөргөлдөөн Ойрхи Дорнод дахь газрын тосны нийлүүлэлтэд саад учруулж болзошгүй хэмээн сэрэмжилж байна. Хэдийгээр газрын тосны үнэ огцом нэмэгдсэн ч бүс нутгийн эрчим хүчний ханган нийлүүлэлтэд доголдол гарахгүй гэдэгт шинжээчид найдаж байна.

Харин газрын тосны үнийн өсөлт хэдий нь сулраад байгаа дэлхийн эдийн засагт дахин нэг цохилт болж ганхуулж болзошгүй хэмээн сэрэмжилж байгаа ажээ.

 

Эх сурвалж: www.cnn.com   

---