Өнөөдрөөс эхлэн автобуснуудад суурилуулсан камерын бичлэгээр нэгдүгээр эгнээгээр зорчиж журам зөрчсөн автомашинуудад зөрчлийн хуулиар хариуцлага тооцохоор боллоо.

Хотын төвийн гудамжаар том оврын автобусыг зөвхөн нэгдүгээр эгнээгээр зорчуулах шийдвэрийг 2010 оноос эхлэн өнөөдрийг хүртэл мөрдсөөр ирсэн. Энэ журам төдийлөн хэрэгжихгүй байгаагаас замын түгжрэлд тодорхой хэмжээгээр нөлөөлж байна хэмээн иргэд шүүмжилдэг.

Иймд зөвхөн нийтийн тээврийн хэрэгсэлд зориулагдсан тэмдэг бүхий эгнээгээр явж байгаад камер харангуутаа буцаж эгнээндээ орох гэж бусдад хүндрэл учруулдаг, халтуур хийж автобусны буудал дээр байнга зогсдог, явган хүний зам дээр машинаа орхиод явдаг зэрэг зөрчлүүдэд торгууль ногдуулахаар болжээ.

Зөвхөн автомашин гэлтгүй өөрийнх нь эгнээ чөлөөтэй байхад өөр эгнээгээр уралдаж явдаг автобусны жолооч нарт ч мөн хариуцлага тооцох юм байна. 

Улаанбаатар хотын хэмжээнд камерын хяналтаар жилд 550 орчим мянган зөрчлийг илрүүлдэг бөгөөд 12 тэрбум төгрөгийн торгууль ногдуулдаг гэсэн үг. Үүнд 7-8 төрлийн зөрчил багтдаг байна. Чиглэлийн тээврийн хэрэгслийн эгнээ нь тусдаа тэмдэг тэмдэглэгээтэй ба үүнийг зөрчвөл 20 мянган төгрөгөөр торгоно. 

---