™ watch
™ watch
УИХ-ын сонгуулийн тухай хуульд сонгуульд нэр дэвших хүсэлтэй төрийн алба хаагчид, төрийн үйлчилгээний албаны удирдах албан тушаалтан, төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн дарга, дэд дарга, захирал, дэд захирал, Засгийн газрын байгуулсан хамтын удирдлагын байгууллагын орон тооны болон орон тооны бус гишүүд сонгууль болох оныхоо нэгдүгээр сарын нэгний өдөр гэхэд ажлаасаа чөлөөлөгдсөн байх ёстой юм.
Энэ дагуу нэгдүгээр сарын нэгэнтэй зэрэгцээд хэд хэдэн төрийн алба хаагч, төрийн өмчит компаниудын удирдлагууд ажлаа хүлээлгээн өгч, сонгуульд нэр дэвшихээ зарласан.
Тухайлбал,
БСШУСЯ-ны Төрийн нарийн бичгийн дарга Б.Баярсайхан, , Байгаль орчин, аялал жуулчлалын яам/БОАЖЯ/-ны Төрийн нарийн бичгийн дарга Ц.Цэнгэл, Хавдар судлалын үндэсний төвийн дарга, гавьяат эмч Ж.Чинбүрэн, Хил хамгаалах ерөнхий газрын дарга/ХХЕГ/-ын дарга, хошууч генерал Ц.Сэргэлэн, “Эрдэнэс Монгол” ХК-ийн дэд захирал О.Одбаяр, МИАТ компанийн дэд захирал Н.Энхбаатар, Хөгжлийн банкны гүйцэтгэх захирал Г.Амартүвшин нар ажлаа өгөөд буй.
Тэгвэл сонгуульд нэр дэвшигчийн буухиаг Нийслэлийн орон сууцны корпорацийн захирал Б.Сүхбаатар үргэлжлүүлжээ. Тэрээр мөн л УИХ-ын сонгуульд нэр дэвшихээ мэдэгдлээ.
Ажлаа өгсөн дээрх эрхмүүдээс БОАЖЯ-ны Төрийн нарийн бичгийн дарга Ц.Цэнгэл Элчин сайдаар томилогдохоор ажлаа өгсөн бол Ц.Сэргэлэн, Г.Амартүвшин нар нэр дэвшихгүй байж магадгүй гэсэн таамаг байна. Учир нь ХХЕГ-ын дарга, хошууч генерал Ц.Сэргэлэнг одоо шалгагдаж байгаа нэгэн хүнтэй холбон хүчээр зайлуулсан бол Хөгжийн банкны гүйцэтгэх захирал Г.Амартүвшинг ажлыг нь хүчээр өгүүлээд оронд нь чих зөөлөнтэй өөр хүн томилуулах улс төрийн тоглолт явж байгаа ч гэж учир мэдэх зарим нэг нь үзэж байна.
Г.Амартүвшин зарчим ярьдаг, ямар нэгэн улс төрийн нөлөөнд автахгүй байх магадлалтай учир түүнийг сонгуульд нэр дэвшүүлэх нэрээр займчуулж түлхэж байхыг ч үгүйсгэхгүй юм.
Хавдар судлалын үндэсний төвийн дарга асан, гавьяат эмч Ж.Чинбүрэн төрсөн нутаг Сүхбаатартаа нэр дэвшинэ гэдгээ ил, далд мэдэгдээд байгаа.
“Эрдэнэс Монгол” ХК-ийн дэд захирал Одончимэдийн Одбаярын хувьд аавынхаа улстөрийн замналыг үргэлжлүүлж, Дорноговиос нэр дэвшинэ гэсэн мэдээлэл байна.
Харин Нийслэлийн орон сууцны корпорацийн захирал Б.Сүхбаатар гурвантаа сонгогдоод байгаа Баянзүрх дүүргээ сонгоод байгаа бол МИАТ компанийн дэд захирал Н.Энхбаатарын хувьд одоогоор тодорхой шийдэгүй байгаа ажээ.
