Солонгосын хойгийг цөмийн зэвсэггүйжүүлэх зургаан талт хэлэлцээрт Монгол улсын оролцоо чухал гэж Оросын Гадаад хэргийн дэд сайд Игорь Моргулов мэдэгджээ. Зургаан талт хэлэлцээрт одоогоор Орос, Хятад, Умард ба Өмнөд Солонгос, АНУ, Япон улсууд багтаж байна.

Хэлэлцээрийг дахин эхлүүлэх талаар өнгөрсөн долоо хоногт АНУ-ын Умард Солонгосын асуудал хариуцсан тусгай төлөөлөгчтэй Москвагийн дипломатууд хэлэлцжээ.

Игорь Моргулов: “Хэлэлцээрийн явцыг нууцлах шаардлагагүй, шинэ өнгө төрхтэйгээр дахин эхлүүлнэ. Хэрэв бид Зүүн Хойд Азийн аюулгүй байдал, энх тайвны асуудлаар ярьж байгаа бол Монгол улс энэ бүсэд оршдог. Тиймээс хэлэлцээрт оролцох боломжтой. Хэрэв Монгол улс хэлэлцээрт албан ёсны байр суурьтайгаар оролцвол хэлэлцээр долоон талт болно” гэжээ.

Орос, Хятад, Умард ба Өмнөд Солонгос, АНУ, Япон улсуудын хамтарсан Солонгосын хойгийг цөмийн зэвсэггүйжүүлэх зургаан талт хэлэлцээр 2008 онд Пхеньяны хүсэлтээр зогсоод байсан юм.

Эх сурвалж: www.tass.com

 

---