Орчин цагийн тулааны урлагийн гол төлөөлөгч болсон Брюс Лигийн зургийг зөвшөөрөлгүй ашигласан Real Kunfu түргэн хоолны сүлжээ зоогийн газрыг шүүхэд өгчээ. Брюс Лигийн охины хэлснээр тус сүлжээ зоогийн газар аавынх нь зургийг ашиглахдаа огт зөвшөөрөл аваагүй гэсэн байна.

Брюс Ли Энтерпрайсес компанийг удирддаг их мастерын охин Шэннон Ли албан ёсоор шүүхэд хандсан байна. Сүлжээ зоогийн газар тулааны их мастерын зургийг хаяг, сурталчилгаанаасаа нэн даруй авч буулгахыг шаардаж, нөхөн төлбөрт 30 сая ам.доллар нэхэмжилжээ.

Харин Real Kunfu зоогийн газраас уг логог ашиглах зөвшөөрлийг орон нутгийн эрх баригчид олгосон хэмээн хариу мэдэгдсэн байна. Гуанжоу хотод төвтэй зоогийн газар 1990 онд байгуулагдаж, Хятад даяар 600 орчим салбартай бөгөөд сүүлийн 15 жилийн турш уг логог орон нутгийн агентлагийн зөвшөөрөлтэйгээр ашиглаж байна гэжээ.

Ойрын жилүүдэд Хятадын Засгийн газар тулааны их мастер Брюс Лигийн зураг, мэдээллийг ашиглахад оюуны өмчийн эрхийг дэлхий даяар хамгаалахад хатуу хяналт тавихаа мэдэгдээд байгаа юм.

 

 

Эх сурвалж: www.bbc.com

---