Фанта бол 16 настай дунд сургуулийн сурагч. Түүнийг 30 настай багш нь хүчирхийлж эхэлснээс жилийн дараа бие давхар болжээ. Болсон явдлын тухай аавдаа хэлсэн ч багш нь хэргээ хүлээхээс эрс татгалзсан байна.

16 настай бие давхар сурагч охинд тохиолдсон явдал Сенегалын дунд сургуулиудад удаа дараа гарсан хэргүүдийн нэг. Фанта жирэмсэн болсон тул үргэлжлүүлэн суралцаж чадахааргүй болжээ.

“Human Rights Watch” хүний эрхийн байгууллагаас Сенегал улсын дунд сургуулийн багш нар сурагчдаа хүчирхийлэх явдал их байгааг анхааруулсан байна. Багш нар ядуу айлын сурагчдыг анги дэвшүүлэх, хоол хүнс авч өгөх, гар утас шинэ хувцас худалдаж авч өгөх зэргээр хуурч дарамтлан бэлгийн харьцаанд хүчээр оруулдаг гэжээ.

Нэрээ нууцлахыг хүссэн 16 настай сурагч хүний эрхийн байгууллагад хандан ярихдаа “багш нь түүнийг гэртээ аваачиж, хэрэв татгалзвал анги улираана гэж сүрдүүлэн хүчирхийлсэн” гэжээ.

“Human Rights Watch” хүний эрхийн байгууллага Сенегал улсад сургуулийн насны хүүхдүүдтэй холбоотой хүчирхийлэл, хүйсийн тэгш бус харьцаанд суурилсан гэмт хэргүүд нийтлэг үзэгдэл болсон гэжээ. Энэ талаар тодруулга авахаар CNN агентлаг Сенегалын Боловсролын яаманд удаа дараа хандаж, хүсэлт явуулсан ч хариу өгөхөөс татгалзсаар байна.

Тус улсын Засгийн газар 2013 оноос хойш хүүхдүүдийг хамгаалах хөтөлбөр хэрэгжүүлж, сурагчтайгаа бэлгийн харьцаанд орсон сургуулийн ажилтанд 10 хүртэл жилийн хорих ял оноох хууль баталсан. Тухайн жилд Сенегал улсад хүчирхийлэлд өртсөн хүүхдүүдийн 10 гаруй хувь нь багш нартаа хүчирхийлүүлж бие давхар болсон судалгаа гарч байжээ.

Тиймээс энэ үзэгдэл зөвхөн хүүхдийн хүчирхийлэлд холбоотой төдийгүй боловсролын тогтолцооны гажуудал болж байна.

Эх сурвалж: www.cnn.com

---