- Ерөнхий сайдын өгсөн захирамжийн дагуу шадар сайд Ө.Энхтүвшингээр ахлуулсан ажлын хэсэг гарч Монгол Улсын бүх тусгай зөвшөөрлийг шалгаж дуусчээ -

Шадар сайд Ө.Энхтүвшин: "Манай улсад байх 2889 тусгай зөвшөөрөл байгаагаас 1225 нь хайгуулын, 1664 ашиглалтын зөвшөөрөл байна. Эндээс алтны 566, барилгын 324, нүүрсний 26, жоншны 186, төмрийн 77 тусгай зөвшөөрөл байна.

Эдгээр нийт тусгай зөвшөөрлүүдэд Засгийн газраас ажлын хэсэг гарч шалгалт хийж дууслаа. Шалгалтыг 38 шалгуур үзүүлэлтээр хийсэн. Тухайлбал, байгаль орчны үнэлгээ хийлгэсэн эсэх, усны дүгнэлт хийлгэсэн эсэх, ТЭЗҮ хийсэн эсэх, оршин суугч иргэдийн саналыг авсан эсэх, АМНАТ төлсөн эсэх... гэх зэргийг шалгалаа.

Шалгалтын үр дүнд нэгдсэн сантай болох шийдвэрт хүрсэн. Учир нь нэгдсэн мэдээллийн сан байхгүй учир лиценз замбараагүй олгодог, татвараа төлдөгүй зэрэг хариуцлагагүй уул уурхай газар авсан гэж үзсэн. Ингээд нэгдсэн сантай болсноор зөрчил гаргасан компаниудын лицензийг автоматаар цуцалдаг болно.

Мөн дугаар тараах ажлыг нэг цэгт төвлөрүүлэх, түгээмэл тархацтай ашигт малтмалын тухай хуулийг хүчингүй болгохыг УУХҮ-ийн сайдад үүрэг болголоо. Мөн бичил уурхайн олборлолтыг зохицуулсан 151-р тогтоолыг хүчингүй болох талаар хэлэлцсэн" гэлээ.

Гэхдээ энэ удаа 151-р тогтоолыг түр орхиж газар дээр нь очиж танилцахаар болсон аж. Үүнээс гадна Засгийн газраас гаргасан хамгийн анхаарал татахуйц нэг шийдвэр нь хайгуулын зөвшөөрөл түр хугацаагаар олгохгүй байх шийдвэрт хүрчээ.

---