Австрали улсад хамгийн халуун өдөртөө агаарын температур дунджаар цельсийн 40,9 хэм хүрч халж байсан удаатай. 2013 оны нэгдүгээр сарын долоонд агаарын температур цельсийн 40,3 хэмд хүрсэн нь хамгийн халуун өдөрт тооцогдож байжээ.

Харин энэ долоо хоногийн баасан гарагт агаарын температур Однадата, Порт Аугустад цельсийн 48, Сиднейн баруун дүүргүүдэд цельсийн 45 хэм хүртэл халж түүхэнд бичигдэж байгаагүй халуун өдөр болохыг цаг уур судлаачид сэрэмжлүүлжээ.

Цаг агаар хэт халснаас ган гачиг, ойн түймэр хэдэн зуугаараа асч байгаад тус улсын Ерөнхий сайд Скотт Моррисон багагүй зэмлэл шүүмжлэлтэй тулгарч байгаа юм. Австрали улсын зүүн нутгаар энэ долоо хоногт цаг агаарын халуун урсгал дайрч өнгөрнө гэжээ.

Энэ долоо хоногийн эхэнд баруун Австралийн Перт хотод агаарын температур цельсийн 40 хэмээс дээш гарсан байна. Австрали улсын хамгийн халуун 10 жилийн ес нь 2005 оноос хойш бүртгэгджээ. Удахгүй улиран одох 2019 он хамгийн халуун жилүүдийн жагсаалтын эхний дөрвөн байранд багтах нь гарцаагүй гэж цаг уур судлаачид анхаарууллаа.

 

 

Мөн энэ бямба гарагт Шинэ Өмнөд Уэльсийн нутагт өндөр хэмтэй халах ба түймрийн утаа Сидней хотыг дахин хучна гэж таамаглаж байна. Тус мужид зуу гаруй гал асч байгаа бөгөөд ойн түймэр 400,000 га талбайг хамарчээ.

 

Эх сурвалж: www.theguardian.com, www.bbc.com

---