Хөгжлийн бэрхшээлтэй хүүхдийн сэргээн  засах хөгжлийн төв нь өнгөрсөн тавдугаар сард нээгдсэнээс хойш өнөөдрийг хүртэл өдрийн ба амбулаторийн тусламж үйлчилгээнд 754 хөгжлийн бэрхшээлтэй хүүхдийг хамруулаад байна.

Нэг хүүхдийн эмчилгээ дунджаар 20 хоног үргэлжилж, 2-4 кабинетийн үйлчилгээ авсныг тооцвол давхардсан тоогоор 2500 гаруй хүүхдэд сэргээн засах тусламж үйлчилгээг үзүүлсэн аж.

Тэгвэл тус төв нь энэ сарын 13-наас эхлэн 250 ор бүхий 6 тасагтай хэвтэн эмчлүүлэх тусламж үйлчилгээг эхлүүлжээ. Эхний ээлжид хэвтэн эмчлүүлэх 2, өдрийн эмчилгээний 1 тасгийг нээж, Улаанбаатар хот, Дорнод, Архангай, Өмнөговь, Орхон, Булган, Сэлэнгэ зэрэг хөдөө орон нутгийн 26 хүүхдийг хүлээж аваад байна.

Хөгжлийн бэрхшээлтэй хүүхдүүд эцэг, эхийн хамтаар 14-21 хоногоор хэвтэн эмчлүүлэх боломжтой.

Эрүүл мэндийн сэргээн засах тусламж үйлчилгээг нарийн багажийн шинжилгээ, оношилгоо, хөдөлгөөн засал, хөдөлмөр засал, хэл засал, физик ба эмийн эмчилгээг боловсрол, нийгмийн сэргээн засах эмчилгээтэй хослуулан хүргэдэг ажээ.

Мөн сэргээн засах эмчилгээ үйлчилгээний чанар үр дүнг сайжруулах зорилгоор нэмэлтээр хөдөлгөөн засал, хөдөлмөр засал эмчилгээ ээлжийн хуваарийн дагуу амралтын өдрүүдэд хэвтэн эмчлүүлж байгаа хүүхдүүдэд хийгдэх юм.

---