"Никитон" хамтлагийн даралтат хөгжимчин, "Эмоушн" хамтлагийн продюсер Б.Чинбат 14 хоногийн өмнө БНСУ-д элэг солиулах мэс засалд орж, хагалгаа нь амжилттай болсон талаар бид өмнө нь мэдээлсэн билээ.

Түүний элэг нь хатуурч, церроз болсон тул эмч нар элгээ зайлшгүй солиул гэж оношилсон ба эхнэр А.Сарнай нь донор болохыг зөвшөөрсөн юм.

Хагалгаанд орсныг мэдсэний дараа монголчууд чин сэтгэлээ үгсээ элгээж, эрүүл энхийг хүссэн юм. "Эмоушн" хамтлагийн дуучин А.Сарнай өөрийн нүүр номонд талархалын үгсээ бичсэнийг уншигч таньд хүргэж байна. 

"Бүгдэд нь энэ сайхан өдрийн мэнд. Бид 2-ын бие сайжраад сайхан болж байна. Бид 2-ыгоо сэтгэл санаа, хайр энэрэлээр тэтгэж дэмнэж байсан бүх хайртай гэр бүлийнхэн, анд найз, ах эгч, дүү нартаа баярлалаа.

Энэ том хагалгааны дараа бид 2-т дэлхийн өнцөг булан бүрээс илгээсээр байгаа тэр их хайр, сэтгэлийн гүнээс хайрласан сайхан үгс бүр нь бидэнд ямар их урам зориг, сэтгэлийн хүч өгч чадаж байгааг биеэрээ мэдрэн сууна.

Сайхан монгол ахан дүүстээ Чинбаа бид 2 нь гүнээ талархаж байнаа.
Та нар минь бие биедээ үргэлж сайхан үгсийг харамгүй хэлж, хайраа харамгүй түгээж, сайхан зүйлсийг бодож байгаарай.
Ер нь биеэ байнга шинжлүүлж, сайхан эрүүл хоол хүнсийг хэрэглэж, сэтгэл санаагаа тайван амгалан байлгах нь эрүүл байхын үндэс юм шүү.
Энэ зурагны тайлбар болгож сонин дуулгахад: Манай энэ эмнэлгийн дарга нь тусгай өвчтөнүүддээ үндэснийхээ загвартай орчин үеийн дээл зориулж оюулж бэлэглэдэг юм байна. Монголын урлагийн сайхан хүмүүс ирж эмчлүүлж байгаад баярлалаа гээд бид 2-т ийм гоё дээл хийлгэж бэлэглэсэн чинь их сайхан санагдсан" хэмээн бичсэн байна. 

---