УИХ-ын гишүүн Л.Энх-Амгалан нарын санаачилсан Сонгуулийн тухай хууль Үндсэн хууль зөрчсөн гэх шүүмжлэл дагуулж байгаа юм. Өөрөөр хэлбэл, уг хуулинд “Эрүүгийн хариуцлага хүлээж байгаа хүн” сонгуулд нэр дэвшихгүй гэх заалт оруулсан нь хүний сонгогдох, сонгох эрхийг зөрчсөн гэж зарим хуульч, судлаачид үзэж байгаа юм. Энэ талаар бид УИХ дахь МАН-ын бүлгийн дарга Д.Тогтохсүрэнгээс тодрууллаа.

УИХ дахь МАН-ын бүлгийн дарга Д.Тогтохсүрэн:

-“Эрүүгийн хариуцлага хүлээж байгаа” хүн нэр дэвшихгүй гэдэг заалт нь мөрдөн байцаалтын болон хэрэг бүртгэлтийн шатанд байгаа хүн нэр дэвшихгүй гэж ойлгоод байна. Гэхдээ тийм биш. Манай Үндсэн хуулинд зөвхөн “хэрэг нь шүүхээр шийдэгдэж, ял авсан хүн нэр дэвшихгүй” байх ёстой.

Харин шинээр орж ирсэн Сонгуулийн хуулин дээр бичигдсэн “Эрүүгийн хариуцлага хүлээж байгаа” гэдэг нь хорихоос бусад ял авчихсан хүмүүст хамаарна. Тухайлбал, торгуулийн ял, тэнсэн харгалзах ял, шүүхээс төрийн алба хаах эрхээ хасуулсан хүмүүс сонгуульлд нэр дэвших боломжгүй гэсэн үг.  Үүнийг тодруулж сонгуулийн хуулиндаа тайлбартай оруулах гэж байна.

Өөрөөр хэлбэл, хуулийн хариуцлагад татагдсан, хэрэг бүртгэлийн шатанд яваа, мөрдөн байцаалтын шатанд яваа, сэжигтэн яллагдагчаар татагдсан хүмүүст хамаарахгүй.

---