Шинэ Зеланд улсын Цагаан арал дээр орон нутгийн цагаар ням гарагийн 14 цаг 11 минутад галт уул оргилж, халуун үнс нурмаа цацаж эхэлжээ. Галт уул дэлбэрэх үед арал дээр 50 орчим жуулчин ойрхон явж байсныг албаныхан мэдээлсэн юм.

Хамгийн сүүлд авсан мэдээллээр таван хүн амь эрсдэж, 10 гаруй хүн сураггүй алга болоод байгаа ажээ. Зарим эх сурвалж сураггүй алга болсон иргэдийн тоог хараахан тогтоогүй байна гэжээ.

23 хүнийг галт уулын орчмоос аварсан ба Цагаан арал дээр Австрали улсын 20 гаруй жуулчин байсныг мэдээлжээ. Эмнэлэгт хүргэгдсэн хүмүүс галт уулын дэлбэрэлтээс болж түлэгдэж бэртсэн байна.

Шинэ Зеландын арми цагдаагийн байгууллагатай хамтран аврах ажиллагаанд оролцож байна. Галт уул дэлбэрэх үед 100 орчим хүн байсан гэж мэдээлсэн ч нарийвчлан судлахад хоёр дахин бага хүн галт уулын орчимд явж байсныг тогтоосон юм.

 

 

Вакаари буюу Цагаан арал нь Шинэ Зеландын умард хэсэгт байрлах ба газар хөдлөлт, галт уулын дэлбэрэлтийн идэвхтэй бүсэд ордог.  Гэсэн ч аялагч жуулчид ихээр зорчдог байна.

Цагдаа нар арлын оршин суугчдыг гэрээсээ гарахгүй байхыг анхааруулжээ. 2016, 2012 онуудад уг арал дээр галт уул оргилж байсан ч ойр орчимд нь хүн байгаагүй учир аюулгүй өнгөрчээ.

 

Эх сурвалж: www.bbc.com

---