Хан-Уул дүүргийн 11 дүгээр хороо Ар Зайсангийн суурьшлын бүсийн иргэд, оршин суугчдын хүсэлтийн дагуу нийтийн тээврийн үйлчилгээ явуулахаар хотын захирагч захирамж гаргасан билээ. Тэгвэл хотын даргын захирамжийн дагуу өнөөдөр НИТХ-ын Тэргүүлэгчдийн хурлаар Ар Зайсангийн чиглэлд 15 минут тутамд дөрвөн автобус үйлчлэх шинэ чиглэлийг баталлаа.

Ар Зайсангийн чиглэлд Могул хотхон, Хунгийн хотхон, Зайсан вилла, Номун вилла хотхонд 980 өрхийн 3790 иргэн амьдардаг бөгөөд амралтын өдрүүдэд Богд уул руу алхалт хийдэг 600 гаруй хүн байдаг юм.

Иймд иргэдийн хүсэлтийг харгалзан нийслэлийн Нийтийн тээврийн газраас Ч:72 Хан Богд амралт-Төв номын сан чиглэлийг шинээр нээж, энэ сарын 12-ноос өдөр тутам өглөө 06:30-10:30 цаг хүртэл үйлчлэх гэнэ.

Тэргүүлэгчдийн зүгээс автобусны зогсоол болон Богд уул руу алхдаг иргэдэд зориулсан нийтийн бие засах газрын асуудлыг хэрхэн шийдэх талаар асууж тодруулсан юм.

Ирэх оны төсөвт шинээр нийтийн тээврийн 50 зогсоол байгуулахаар төлөвлөсөн бөгөөд энэ тоонд Ар Зайсангийн чиглэлд автобусны зогсоолыг шинээр барих болно гэсэн юм. Түүнчлэн Богд ууланд нийтийн бие засах газрыг байгуулах боломжийг нэн даруй судлахыг үүрэг болгосон юм.

---