Дэлхийн түүхэнд тодоор тэмдэглэгдэн үлдсэн байдаг Хавайн Хонолулугийн Сувдан эрэгт орон нутгийн цагаар лхагва гарагийн үдээс хойш Америкийн далайчин халдлага үйлджээ. Сэжигтэн хоёр иргэн рүү гал нээж амь насыг нь хороож, гурав дахь иргэнийг шархдуулсныхаа дараа өөрийгөө буудаж хороосон байна.

Сувдан эрэг дээрх Хикхэм хамтарсан цэргийн баазын ажилтнууд хэргийг мөрдөн шалгаж байгаа тухай мэдэгджээ. Одоогоор хэрэгт холбогдолтой хохирогчдын нэрийг олон нийтэд зарлаагүй байна.

Үдээс хойш 14 цаг 30 минутын үед Хонолулугийн гал сөнөөгчид усан онгоцны үйлдвэрт буун дуу гарсан тухай дуудлага хүлээж авчээ. Халдлага Драй Док 2 нэртэй усан онгоцны үйлдвэрийн хэсэгт гарсан байна.

Хэрэг гарсны дараа энэ хэсгийг тусгаарлажээ. Сувдан эргийн Хикхэмд АНУ-ын тэнгисийн цэрэг болон нисэх хүчин хамтран байрлаж байгаа юм. 10 сөнөөгч, 15 шумбагч хөлөг боомтод зогсдог бөгөөд усан онгоц, шумбагч хөлгүүдийг шинэчлэн сайжруулах, засварлаж сэлбэх ажлыг үйлдвэрт гүйцэтгэдэг байна.

 

 

Энэ бямба гарагт Сувдан эрэг Японы гэнэтийн дайралтад өртсөний 78 дахь жилд хүндэтгэл үзүүлэх юм. 1941 оны 12 дугаар сарын долооны өдрийн Сувдан эргийн дайралтаар АНУ 2,300 гаруй хүнээ алдаж 1,500 орчим хүн шархадсан гэж түүхэнд тэмдэглэгдсэн билээ.

 

Эх сурвалж: www.theguardian.com  

---