Австралийн цагдаа нар умард нутагт төөрч сураггүй алга болсон иргэний цогцсыг олсон ба хурууны хээ нь таарсан гэдгийг мэдэгджээ. Цогцсыг бүрэн таниулах ажил хараахан дуусаагүй ч 11 дүгээр сарын 19-ний өдрөөс хойш сураггүй болсон гурван хүний нэг мөн гэдэгт итгэлтэй байна.

46 настай хатагтай Клайр Хокриж нь 52 настай хатагтай Тамра МакБийт Рилей, 40 настай Фу Тран нарын хамт ууланд авирахаар аялалд гарсан ч тэдний машин 19-ний өдөр голын намагт суужээ. Өнгөрсөн ням гарагт МакБийт Рилей болон түүний нохой Раяа нарыг шаварт суусан машинаас нь 1,5 км зайтай олсон бол мягмар гарагт машинаас 12 км-т Траныг олсон юм.

Харин гурав дахь зорчигч эмэгтэй олдоогүй хэвээр байжээ. Задлан шинжилгээний дүгнэлт бүрэн гараагүй ч урьдчилсан байдлаар Клайр Хокрижийг усгүйдэж, харангатаж амиа алдсан гэж таамаглаж байна. Австралийн хойд нутгийн эзгүй цөлд хүн ам сийрэг оршин суудаг төдийгүй өдөртөө цельсийн +40 хэм хүртэл халдаг ажээ.

Машин нь намагт суусны дараа тэд гурав хоногийн турш шавраас гаргах гэж оролдоод чадаагүй тул тусламж дуудахын тулд салж явахаар болсон байна. Тэд машиндаа байсан ус, архи, жигнэмэг, үхрийн махтай гоймон зэргээ идэж барсан учраас тусламж дуудахаас өөр аргагүйд хүрчээ.

Тран болон Хокриж нар төв замыг чиглэн явж МакБийт Рилей нохойгоо хол алхаж чадахгүй гэж бодсон тул машиндаа үлджээ. Траны хэлснээр фермерийн эзэн түүнийг олохоос хоёр хоногийн өмнө хатагтай Хокрижээс салж төмөр хайсыг дагаж явсан нь амийг нь аварсан байна.

 

Эх сурвалж: www.bbc.com

---