Өнгөрсөн нэгдүгээр сарын 4-ний өдөр Зайнаб Ансари нэртэй зургаан настай бяцхан охин сураггүй алга болоод тав хоногийн дараа хогийн цэгээс цогцос нь олдсон аймшигт хэрэг Пакистаны Касур хотод гарсан. Охиныг олоход хүчирхийлүүлж амиа алдсан байдалтай байсан юм.

Улс орон даяар цагдаагийн байгууллагыг шүүмжлэн буруушааж, гэмт этгээдийг нэн даруй илрүүлэн ялыг нь оноохыг шаардсан жагсаал газар авч, хоёр хүн амиа алдсан байна. Охиныг нас биенд хүрсэн эрэгтэй хулгайлж байхыг харуулсан хяналтын камерын бичлэг олдсон ч цагдаа нар цогцосыг нь олох хүртэл тав хоногийн турш гар хамхин суусан гэж охины гэр бүлийнхэн буруутгаж байсан юм.

Охины биеэс олдсон ДНК-ын мөрөөр гэмт хэрэгтэн Имран Алиг нэгдүгээр сарын 23-ны өдөр баривчилж, хоёрдугаар сард болсон шүүх хурлаар ялын дээд хэмжээ буюу цаазаар авах ялыг оноожээ.

Касур хотод өнгөрсөн хоёр жилийн хугацаанд хэд хэдэн удаа бага насны охидыг хүчирхийлэн хороосон хэрэг гарч байсан байна. Зайнаб охиноос гадна зургаан охиныг хүчирхийлсэн хэрэгт Имран Алиг буруутгажээ. Гэмт этгээдэд өршөөл үзүүлэхгүй байх шийдвэрийг эрх баригчид гаргасан.

Лхагва гарагийн өглөө гэмт хэрэгтнийг цаазаар авсан байна. Цаазын ялыг гүйцэтгэхэд харамсалтайгаар амиа алдсан бяцхан охины гэр бүл байлцжээ.

Пакистан улсад 2018 оны эхний хагаст хүүхдийн эсрэг 2,300 гэмт хэрэг гарсны 57 нь хүчирхийлэн хороосон хэрэг байна.

 

Эх сурвалж: www.bbc.com

---