Өмнөд Солонгос улс өвлийн улиралд агаарын бохирдолтой тэмцэхийн тулд нүүрс түлдэг эрчим хүчний станцуудынхаа ¼-ийг ирэх сараас эхлэн түр хугацаанд хаахаа мэдэгджээ. Ингэснээр агаарыг бохирдуулж буй нэн аюултай түвшинд хүрсэн нарийн тоосонцрын хэмжээ мэдэгдэхүйц буурна гэж үзжээ.

Тус улсын Эрчим хүчний яамны мэдэгдсэнээр 12 дугаар сараас хоёрдугаар сар хүртэл 14 станц сул зогсолт хийнэ. Харин гуравдугаар сард хэд дахин их буюу 27 станцыг түр зогсоохоор төлөвлөжээ. Эдгээр сул зогсолтууд өвлийн улиралд иргэдийг эрчим хүчээр хангах хэрэгцээ шаардлагад ямар нэг өөрчлөлт оруулахгүй гэсэн байна.

Йонхап агентлагийн мэдээлснээр бусад үйлдвэрүүд нөхцөл байдлаас шалтгаалж 80 хувийн хүчин чадлаар ажиллахаар төлөвлөсөн гэжээ. Өмнөд Солонгос улсад нүүрсээр галладаг 60 орчим эрчим хүчний станц гэрэл цахилгааны нийт хэрэгцээний 40 хувийг хангаж байна. Гэвч нүүрс их хэмжээгээр түлэх нь агаарын бохирдлыг нэмэгдүүлж, хэд хэдэн хотод РМ 2,5 бохирдлын хэмжээ нэн аюултай түвшинд хүрчээ. Мөн агаар дахь нарийн ширхэгтэй тоосонцор иргэдийн эрүүл мэндэд аюул заналхийлж байна.

Эрх баригчид агаарын бохирдлын эсрэг нэн даруй арга хэмжээ авахын тулд эрчим хүчний станцуудыг түр зогсоохоос гадна тээврийн хэрэгсэл, барилга байгууламжийн талбайн үйл ажиллагаанд хяналт тавьж байна. Нүүрс түлдэг станцуудын үйл ажиллагааг хязгаарласнаар нарийн тоосонцор 44 хувиар буурна гэж тооцжээ.

 

Эх сурвалж: www.theguardian.com

---