Эрүүл мэндийн даатгалын ерөнхий газрын дарга Ч.Алтанхуягийг АТГ-аас 2019 оны есдүгээр сарын 09-ний өдөр дайчлан баривчилж байсан. Гэвч Сүхбаатар дүүргийн эрүүгийн хэргийн анхан шатны шүүх Ч.Алтанхуягийг цагдан хорих, таслан сэргийлэх үндэслэл бүхий баримт алга гэдэг үндэслэлээр сулласан юм.

Ч.Алтанхуяг нь албаны эрх мэдлээ урвуулан ашиглаж, Эрүүл мэндийн даатгалын сангийн 30 тэрбум төгрөгийг “Чингис хаан” банканд байршуулсан нь АТГ-т шалгагдах гол нөхцөл болсон байна. Энэ үйлдлийнхээ хариуд тэрбээр "Чингис хаан" банкнаас 2019 оны дөрөвдүгээр сарын 30-наас наймдугаар сарын 31 хүртэлх хугацаанд нийт 86.2 сая гаруй төгрөг бэлнээр авсан нь урьдчилсан байдлаар тогтоогджээ.

Төрийн албан тушаалтанд авлига өгөх замаар өөрсдөдөө давуу байдал бий болгосон "Чингис хаан" банкны ТУЗ-ийнхэн, тус банкны хөрөнгө оруулагч “Нью стандарт финанс” ХХК-ийн удирдлагууд, Чингис хаан банкны гүйцэтгэх захирал С.Сандагдорж нарт АТГ-аас эрүүгийн хэрэг үүсгэн шалгаж байгаа юм байна.

---