Монгол Улсад зам тээврийн ослын улмаас сүүлийн таван жилийн хугацаанд  2700 хүн амь насаа алдаж, 27080 хүн хүнд, хүндэвтэр гэмтэж эрүүл мэндээрээ хохирчээ. Иймд Тээврийн цагдаагийн албанаас автын осол гэмтлээс үүдэлтэй нас баралтыг бууруулах зорилгоор арваннэгдүгээр сарын 29-ны өдрийг “Хичээх өдөр” уриан дор тэмдэглэн өнгөрүүлэхээр болсон байна. Жолооч, замын хөдөлгөөнд оролцогч бүр дүрмээ чанд мөрдөж, сахилга баттайгаар замын хөдөлгөөнд оролцсоноор хоёр хүн амь насаа алдахгүй, 15 хүн эрүүл мэндээрээ хохирохгүй байх боломжтой юм байна.

“Хичээх өдөр” аяны хүрээнд 11.00 цагаас Энхтайваны өргөн чөлөөний авто замын хөдөлгөөнийг 10 минутын турш зогсоож, зам тээврийн ослын хохирогчдод анхан шатны сургалт явуулах видео танилцуулгыг хийх юм байна.

Мөн замын хөдөлгөөний зөрчихгүй байх уриалга бүхий автомашины цуваа Дүнжингарав худалдааны төвөөс 10.20 цагт хөдөлж, нарны замаар дамжин, хүүхдийн паркийн баруун уулзвар хүртэл явах аж.

Хүн бүр замын хөдөлгөөнд хичээж оролцсоноор ямар үр дүн гарсан талаарх дүн мэдээлэл арванхоёрдугаар сарын 03-ны өдөр гарах юм байна. 

---