УИХ-ын чуулганы нэгдсэн хуралдаанаар өнгөрсөн долоо хоногт “Оюу Толгой” ордын ашиглалтад Монгол Улсын эрх ашгийг хангуулах тухай УИХ-ын тогтоолыг баталсан билээ. Тогтоолд,

- Хөрөнгө оруулалтын гэрээг сайжруулахад олон улсад хүлээн зөвшөөрөгдсөн зөвлөх үйлчилгээ авах
- Далд уурхайн санхүүжилтийн талаар 2015 онд байгуулсан нэмэлт төлөвлөгөөг сайжруулах
- “Оюу Толгой” төслөөс хүртэх Монголын талын үр өгөөжийг 53 хувиас бууруулахгүй байх
- Энэ хүрээнд Монголын талын 34 хувийн хувьцааг бүтээгдэхүүн хуваах нөхцөл, эсхүл АМНАТ-т оруулах хувилбарыг судлан шийдвэрлэх зэрэг заалтуудыг тусгасан юм. 

Тэгвэл үүнтэй холбоотойгоор “Rio Tinto” компанийн Гүйцэтгэх захирал Жан-Себастъян Жак мэдэгдэл хийжээ. Тэрээр “Оюу Толгой төслийн далд уурхайн гэрээ хэлэлцээрийг сайжруулах талд Монгол Улсын Засгийн газартай хамтрахад бэлэн байна" гэдгээ онцолжээ.

Түүнчлэн "Монгол Улсын Засгийн газрыг оролцуулаад төслийн бүх хувь эзэмшигчид илүү их үнэ цэн, баялгийг хүртээх илүү сайн арга замыг эрэлхийлэхийн тулд Засгийн газартай яриа хэлэлцээгээ хийсээр байх болно" гэдгийг дурдсан байна.

Уг мэдэгдлийн дараа Австралийн Хөрөнгийн биржид “Rio Tinto” компанийн хувьцааны ханш даваа гарагийн арилжаа дуусах үед 1.99 хувиар өсөж, 95.92 австрали доллар болжээ.

 

 

Эх сурвалж: Bloombergtv.mn

---