Хятадын талаас БНХАУ-ын ӨМӨЗО-ы Алшаа зүүн хошууны Өлзий сумын нутаг дэвсгэрт, Монгол Улсын талаас Өмнөговь аймгийн Номгон сумын нутаг Цагаан дэл уулын чиглэлд хил дагуу байрлах “Өлзий-Цагаан дэлийн боомт”-ын барилгын ажлыг Өмнөговьчууд эсэргүүцэж эхэлжээ.

Учир нь “Өлзий-Цагаан дэлийн боомт”-ын барилгыг хилийн зурваст шахан барьж эхэлсэн нь хилийн тухай хуулийг зөрчиж байна гэж тэд үзэж байгаа ажээ. Мөн дэлхий дээрх хүний гарт өртөгдөлгүй үлдсэн хамгийн сүүлчийн, унаган зэрлэг, уудам газар нутаг, нэн ховор, ховор, устаж болзошгүй 33 зүйл амьтан амьдрах орчингүй болно гэж өмнөговьчууд үзэж байна.

Хилд шахан барьж буй уг боомтыг Монголын талаас “Үлэмж” гэх компани барьж эхэлжээ. Гэвч боомтын ажлыг эхлүүлэхдээ нутгийн иргэдийн сонсгол хийж, байгаль орчинд нөлөөлөх байдлын үнэлгээ огт хийлгээгүй байна. Өөрөөр хэлбэл, хууль зөрчин боомтын барилгын ажил эхэлж байгаа юм байна.

Хятадын талд баригдаж буй барилгын ажил

Монголын талын барилгын ажил

“Өлзий-Цагаан дэлийн боомт” 2004 оноос эхлэлтэй бөгөөд 2014 оны 02-р сарын 21-ны өдөр Монгол Улсын Засгийн газар “Өлзий-Цагаан дэл боомт”-ыг нээлттэй болгож, зорчигч, ачаа тээврийн байнгын ажиллагаатай боомт болгохоор тогтсон байна. Уг асуудлаар бид албаны хүмүүсээс тодруулж дахин мэдээлэх болно.

---