Монголын улс төрийн намууд түүхэндээ анх удаа "Эв нэгдлийн төлөө" түншлэлийг бий болгохоор хамтарч ажиллахаар болжээ.
Манай улсад улс төрийн 35 нам албан ёсоор бүртгэлтэй үйл ажиллагаа явуулж байна. Эдгээр намуудаас 28 нам нэгдэн энэ сарын 26-ны өдөр анхдугаар зөвлөгөөнийг зохион байгуулж, цаашид хамтран ажиллах тунхаг бичиг гаргана.

Уг зөвлөгөөнөөр өнгөрсөн 30 жилийн Монголын улс төр, нийгэм, эдийн засгийн байдалд дүн шинжилгээ хийж, ирээдүйн 30 жилийн улс төр, нийгэм эдийн засгийн хөгжлийн төлөв хандлага ямар байх ёстой тухай нэгдсэн бодлогын хэлэлцүүлэг хийх гэнэ. 

Анхдугаар зөвлөгөөнөөр намуудын удирдах түвшний албан тушаалтнууд оролцох бөгөөд МАН, АН-ын төлөөлөл оролцохгүй.
Монгол улсыг доройтуулсан хоёр том намын эсрэг монголын улс төрийн намууд нэгдэн ажиллахаар болно. Улс төрийн намууд Улсынхаа тусгаар тогтнол, бүрэн эрхт байдлыг бататган бэхжүүлж, үндэснийхээ язгуур эрх ашиг, эв нэгдлийг эрхэмлэн дээдэлж, төрт ёс, түүх, соёлынхоо уламжлалыг нандигнан өвлөж, хүн төрөлхтөний соёл иргэншлийн ололтыг хүндэтгэн үзэж, эх орондоо шударга ёс, хүний эрхийг дээдэлсэн хүмүүнлэг, аз жаргалтай нийгмийг цогцлуулан хөгжүүлэхийг эрхэм зорилго болгосон тунхаг гаргах болно.

---