Төрийн албаны зөвлөлөөс Тээврийн цагдаагийн албатай хамтран албаны машиныг хувьдаа ашиглаж байгаа эсэхэд энэ сарын 11-нд гэнэтийн шалгалт хийсэн билээ. Шалгалтын үеэр Гаалийн ерөнхий газрын бүртгэлтэй 0573 УБҮ дугаартай Соната-8 автомашины жолооч цагдаагийн алба хаагчаас зугтсан тухай мэдээлэл цацагдсан билээ.

Тэгвэл Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргалаас тодруулахад "Гаалийн ерөнхий газрын машины жолооч бичиг баримтаа үзүүлэхгүй зугтаасан зүйл байхгүй. Цагдаагийн алба хаагчийн шаардлагыг хүлээн авч, бичиг баримтаа үзүүлсэн. Энэ нь алба хаагчийн энгэрийн камерийн бичлэгт үлдсэн. Тухайн үед сэтгүүлч яриа авах үед өгөхгүй гээд явсан байсан.

Гэхдээ тухайн машины урд салхины шилэнд наасан гэрэл бууруулагчийг /хар тень/ хуулж, 20,000 төгрөгөөр торгох арга хэмжээ авахаар болсон. Тээврийн хэрэгслийн жолоочийг дуудсан боловч ажилдаа ирэхгүй байгаа гэсэн мэдээллийг ГЕГ-аас өгсөн. Иймд Тээврийн цагдаагийн албанаас тухайн автомашиныг замын хөдөлгөөнд оролцох үед нь манай хэлтэст шилжүүлэхээр зарлуулсан. Уг автомашин замын хөдөлгөөнд оролцох юм бол шууд журмын хашаанд оруулж хар тенийг хуулж, жолоочийг торгох юм. Замын хөдөлгөөний дүрмийн 4 дүгээр хавсралтын 6.6-г зөрчсөн тул торгож байгаа юм.

Албаны машинаар хүүхэд зөөсөн асуудалд хариуцлага тооцох уу гэхэд ТЦА хариуцлага тооцох эрхзүйн үндэслэл байхгүй тул Замын хөдөлгөөний дүрэмд заасны дагуу арга хэмжээ авна" гэлээ.

---