Алибаба цахим худалдааны сүлжээ 2009 оноос хойш жил бүрийн 11 дүгээр сарын 11-ний өдөр буюу дөрвөн ширхэг нэгийн тоо давхацсан энэ өдөрт ганц биечүүдэд зориулан хямдралтай худалдаа эрхэлдэг уламжлал тогтсон юм. Энэ өдрийг хосуудын баярт ач холбогдол өгдөггүй бүх хүмүүст зориулсан байна.

Энэ жил 11 11 хямдралтай худалдаа долоо хоногийн эхний өдөр тохиож байгаагаараа онцлог төдийгүй өдрийн хагас өнгөрөхөд нийт 24 тэрбум ам.долларын худалдаа хийжээ. Өнгөрсөн жилийн 11 дүгээр сарын 11-ний өдөр Алибаба цахим худалдааны компани 30 тэрбум ам.долларын худалдаа эрхэлсэнтэй харьцуулахад энэ жил өмнөх амжилтаа эвдэх төлөвтэй байгааг шинжээчид мэдээлээд байна.

 

 

Түүнчлэн цаг хүрэхгүйн хугацаанд буюу эхний 40 минутад 100 тэрбум юанийн худалдаа хийсэн амжилт тогтоогоод байгаа юм. Өнөөдрийн хямдралтай худалдаа 480 тэрбум ам.долларын үнэлгээтэй Алибабаг үүсгэн байгуулагч, гүйцэтгэх захирал Жэк Маг ажлаа хүлээлгэж өгснөөс хойш зохион байгуулж буй анхны 11 11 хямдралтай худалдаа болж байгаагаараа онцлог ажээ. Дэлхийн хэмжээний од, дуучин Тэйлор Свифт худалдааг нээсэн байна.

 

 

Ганц биечүүдийн өдрийн хямдралтай худалдаагаар Estee Lauder брэнд тэрбум юань буюу 143 сая ам.долларын урьдчилсан захиалга авч хамгийн их борлуулалт хийж буй компаниар шалгараад байна. Үүний дараа Apple компанийн iPhone 11 гар утас 100 сая юань буюу 14 сая ам.долларын урьдчилсан захиалга авчээ.

Нөгөө талаар Америк-Хятадын худалдааны дайн, Хятадын эдийн засаг удааширсан өсөлттэй холбогдуулан багагүй дарамт учирч байгаа гэж эдийн засгийн шинжээчид үзэж байна.

 

Эх сурвалж: www.cnn.com, www.bbc.com

---