Самбо бөхийн насанд хүрэгчдийн дэлхийн аварга шалгаруулах тэмцээн БНСУ-ын Чёнжү хотноо зохион байгуулагдаж дууслаа. 

Энэ удаагийн дэлхийн аварга шалгаруулах тэмцээнд Монгол улсын баг тамирчид тун амжилттай оролцож хоёр алт, нэг мөнгө, найман хүрэл медаль хүртэж багийн дүнгээр эрэгтэй баг хоёрдугаар байранд орлоо. 

Манай сайт гурван өдрийн турш ДАШТ-ийг шууд дамжуулан үзүүлсэн ба медаль хүртсэн тамирчдынхаа бүх барилдааны бичлэгийг түүвэрлэн хүргэдэг уламжлалынхаа дагуу тэмцээний эхний өдөр эрэгтэйчүүдийн -68кг жинд дэлхийн аварга болсон ОУХМ Д.Алтансүхийн бүх барилдааны бичлэгийг толилуулж байна. 

Эрэгтэйчүүдийн -68кг жинд 33 бөх барилдсан ба Д.Алтансүх эхний тойрогт гоц мөргөж хоёрдугаар тойрогт Сальвадор улсын тамирчин Карранза Рикардог ялсан юм. Гуравдугаар тойрогт Английн Феррей Рейнийг оноогоор цэвэр ялж шөвгийн 8-д барилдах эрхтэй болсон. Шөвгийн наймд Украйны Мелниченко Кирилотой барилдан оноогоор ялсан юм. Хагас шигшээд ОХУ-ын Михайл Воробевтэй барилдан ялснаар аваргын төлөө барилдах эрхтэй боллоо. Улмаар Гүржийн бөх Миндия Лулуашвилиг оноогоор ялснаар Монголын самбо бөхийн холбооны 38 дахь дэлхийн аварга боллоо.