Иран улсад баасан гарагийн шөнө 02 цаг 30 минутын үед 5,9 магнитудын хүчтэй газар хөдөлжээ. Газар хөдлөлтийн улмаас одоогоор таван хүн амиа алдаж, 120 гаруй хүн гэмтэж шархдаад байна.

Газар хөдлөлт нийслэл Тегеранаас баруун хойшоо 500 км-т Хаструд тосгоны ойролцоо бүртгэгджээ. АНУ-ын газарзүй судлалын газраас голомтыг Хаструд тосгоноос 60 км, хөрсний гүний өнгөн давхаргад буюу найман км-ын гүнд бүртгэсэн гэжээ.

40 гаруй хөдөөгийн тосгон, сууринд аврах ажиллагаа явагдаж байна. Багадаа 30 гаруй байшин барилга нурсан гэж орон нутгийн хэвлэлээр дамжууллаа.

Ираны газар нутаг дэлхийн гадаргын хоёр гол тектоник хавтангийн уулзвар дээр байрладаг тул газар хөдлөлтийн идэвхтэй бүсэд тооцдог. Тиймээс үе үе хүчтэй газар хөдөлж, асар их хэмжээний гарз хохирол учруулсан түүх олон бий.

2003 онд аймшигтай газар хөдлөлтийн улмаас 31,000 иргэнээ алдаж байжээ. Мөн 1990 онд Ираны хойд нутагт 7,4 магнитудын хүчтэй газар хөдөлж 40,000 хүн амь эрсдэн, 300,000 иргэн гэмтэж бэртэж, сая иргэн орон гэргүй болсон юм.

 

Эх сурвалж: www.theguardian.com

---