ЮНЕСКО-гоос Соёлын биет бус өвийг хамгаалах тухай Конвенцийг 2003 онд батлан гаргаж, СББӨ-өөр уламжлан хүн төрөлхтний соёлын олон янз байдлыг хадгалах замаар тогтвортой хөгжлийг тэтгэн дэмжихийг зорилт болгож буй.
Монгол дахь ЮНЕСКО-гийн батламжит "Байгаль, Соёлын өвийг хамгаалах сан" ТББ-тай хамтран "Соёлын өвд ээлтэй Улаанбаатар" аяны хүрээнд соёлын өвийн цуврал баримтат киног хүргэж байна.

"Монгол Хөөмий" 2010 онд ЮНЕСКО-гийн “ Хүн төрөлхтний соёлын биет бус өвийн төлөөллийн жагсаалт”-д бүртгэгдсэн. Хөөмий нь хүний амьсгалаар авсан уушгин дахь хийг ам, нармай, мөгөөрсөн хоолой, төвөнх, цээжний хөндийгөөр хөөрөгдөн цохилт, тэсрэлт, доргилт үүсгэн цуурайлуулан хөөж хөг, ая, эгшиг үүсгэн хөгжимдөх урлаг юм. Өөрөөр хэлбэл, хүний амьсгалын болон өгүүлэхүйн эрхтнийг хөгжмийн зэмсэг болгосон Хүн-хөгжим. Монголчууд хөөмийн урлагаар хүний өгүүлэхүйн эрхтний оролцоог дээд хэмжээнд хүртэл ашиглан, урлагийн “зэмсгийн“ төгс чанарт хүргэн хөгжүүлж чадсан.

Сонирхуулахад БСШСЯ-ны дэмжлэгээр Соёл, урлагийн газраас санаачлан “Даяаршлын түрлэг дэх Монгол соёлын өвийн дархлаа” соёлын өвийн анхдугаар зөвлөгөөн энэ долоо хоногийн лхагва, пүрэв гарагт Улаанбаатар хотод болно. Үүнд Нийслэлийн Соёл, урлагийн газар, Боловсрол, соёл урлагийн газрын дарга, соёл, урлаг хариуцсан мэргэжилтэн, улс, орон нутгийн музейн захирал, эрдэмтэн, судлаач, мэргэжилтэн, соёлын өв хамгааллын чиглэлээр үйл ажиллагаа явуулж байгаа төрийн бус байгууллага, аж ахуйн нэгжийн төлөөллөөс бүрдсэн 250 гаруй хүн оролцох нь. Монгол соёл өвийн тулгамдсан асуудлаар зохион байгуулж буй энэ анхдугаар зөвлөгөөнд оролцогчдын санал, дэвшүүлсэн санаа бүхэн соёлын өвийг хадгалж хамгаалах, ашиглах, хөгжүүлэхэд үнэтэй хувь нэмэр байх юм.

 

---