"Амар", "Кентавр", "Орентал" зочид буудал,  "Юнион бьюлдинг" оффист байрлаж, Тагнуулын ерөнхий газрын дарга Д.Гэрэлийн хэлсэнчлэн "мөнгө угаах" гэмт хэрэг үйлдэж байсан БНХАУ-ын 759 иргэнийг баривчилсан дуулиан өнгөрсөн долоо хоногт дэгдсэн. Наймдугаар сараас хойш ажиглаж байсан эдгээр иргэд нь жуулчны визээр 20-30-аараа орж ирсэн нь тодорхой болоод байгаа. 

Жуулчин ангиллын 30 хүртэл хоногийн визээр хил нэвтэрсэн 759 иргэний 586 нь БНХАУ-ын Хөх хотод суугаа Ерөнхий консулын газар, 30 нь Эрээн хотод суугаа консулын газар, 21 нь БНХАУ-д суугаа Бээжин дэх ЭСЯ-аас виз авсан байна. Бизнес ангиллын 30 хүртэл хоногийн визээр хил нэвтэрсэн 146 иргэний 94 нь БНХАУ-ын Эрээн хотод суугаа консулын газар, 48 нь Хөх хотод суугаа Ерөнхий консулын газар, 4 нь Хонконг дахь Ерөнхий Консулын газраас тус тус виз авчээ. 

Өнгөрсөн амралтын өдрөөр буюу бямба гарагт эдгээр иргэдийг албадан гаргах үйл явцыг та бүхэндээ шууд дамжуулан хүргэсэн. Эдгээр иргэдийг Гадаадын иргэний эрх зүйн байдлын тухай хуулийн 37.1.7 буюу ирсэн зорилгоосоо өөр үйл ажиллагаа явуулсан үндэслэлээр Монгол Улсад гурван жилийн хугацаанд дахин оруулахгүй байхаар "хар" даран, Замын-Үүд олон улсын боомтоор албадан гаргах шийдвэр гарчээ. 

Цагдаагийн хуягласан хамгаалалттайгаар албадан гаргасан 759 хятад иргэнийг ачсан тусгай галт тэрэг замдаа зогсолтгүй явсаар ням гаригт БНХАУ-ын хууль, хяналтын байгууллагад хүлээлгэн ѳгсөн гэж мэдээллээ. 

---