Австралийн телевизийн реалити шоуны од 49 настай Сюзи Тэйлор  Tinder болзооний аппликэйшнээр танилцаж болзсон залуугаасаа хүчээр мөнгө салгасан буюу дээрэмдсэн хэрэг олны анхаарлыг татаж байна.

Тэрээр Брисбэн дэх байшинд уулзаж, болзсон залуугаас мөнгө нэхэхэд эрэгтэй татгалзсан хариу өгчээ. Энэ үед 20 гаруй настай өөр нэг эрэгтэй өрөөнд орж ирэн 33 настай хохирогч эрэгтэй рүү дайрсан байна.

Сюзи Тэйлор нь 2015 онд The Block шоунд оролцсоноор олны танил болсон юм. Австралийн цагдаа нар хохирогчийн гаргасан гомдлын дагуу реалити шоуны одыг, 22 настай эрэгтэйн хамт баривчлан саатуулжээ. Тэднийг гэмгүй иргэн рүү дайрч доромжилсон, хүчээр мөнгийг нь авсан, эрх чөлөөнд халдсан гэх мэт үндэслэлээр буруутгасан байна.

 

 

Күйнслэндийн цагдаагийн газрын мэдээлснээр гэмт этгээдүүд хохирогчийг хүчээр саатуулж дарамтлан, данснаасаа мөнгө шилжүүлэхэд хүргэсэн гэжээ. Үүгээр зогсохгүй төлбөрийн картыг нь хулгайлж, бэлэн мөнгө гаргаж авсан байна. Харин хэр хэмжээний мөнгийг хүчээр болон хулгайлж авсныг олон нийтэд зарлахаас татгалзжээ.

Реалити шоугаар олонд танигдсан эмэгтэйг батлан даалтад суллахаас татгалзаж, өнөөдөр шүүх хурал нь эхлэх юм байна.

 

Эх сурвалж: www.bbc.com

---