Сэтгүүлчдийн форумын үеэр нэр бүхий найман сэтгүүлчийг чагнаж, тагнасан талаар Хуульзүйн байнгын хорооны дарга Х.Нямбаатар мэдэгдэл хийсэнтэй холбогдуулан Монголын сэтгүүлчдийн нэгдсэн эвлэл, Сайтуудын холбоо хамтран мэдээлэл хийлээ.

 2018 оны 4-р сарын 26-ны өдөр Нийслэлийн прокурорын газраас мэдээлэл хийхдээ "Цагдаагийн байгууллагын нэр бүхий ажилтнууд гүйцэтгэх ажлын хууль тогтоомж зөрчин, нэр бүхий сэтгүүлчдийг тагнаж чагнасан" талаар мэдээлж байсан юм. Уг асуудалтай хологдуулан ТЕГ-аас мөрдөн шалгах ажиллагаа явуулж холбогдох хүмүүсийг эрүүгийн хэрэг үүсгэн яллагдагчаар татах санал ч гаргасан байдаг.

Гэвч хэн, хаанаас сэтгүүлчийг тагнах, чагнуулахаар хууль, хянлтынханд нөлөөлсөн нь тодорхойгүй байна. Гэвч сэтгүүлчдийг тагнасан нь үнэн гэдгийг Прокурорын байгууллага хүлээн зөвшөөрч байгаа ч мэдээллийг зөшөөрөлтэйгээр өгнө хэмээн татгалзаж байгаа юм.
Тиймээс тодорхой мэдээлэл авах зорилгоор Хуульзүй, дотоод хэргийн яам, ЦЕГ, Тагнуулын ерөнхий газарт хандсан ч тодорхой үр дүнд хүрээгүй байна.

Иймд Хүний эрхийн үндэсний комисстой хамтраад сэтгүүлчдийн эрх ашиг, цаашлаад нийт иргэдийн мэдэх эрхийг хамгаалах үүднээс олон улсын байгууллагад хандахаа илэрхийллээ.

Ямартай ч тагнаж, чагнасан гэх асуудалд нэр холбогдсон сэтгүүлч нарын нэрс тодорхой байгаа ч нууцлалын зэрэгтэй шалгагдаж байгаа учраас олон нийтэд ил зарлаж болохгүй байгаа аж.

---