Ливан улсад эдийн засгийн эмх замбараагүй байдал, улс төрийн авлига хээл хахуулийг эсэргүүцсэн иргэдийн жагсаал 13 хоног үргэлжлэхдээ төдийлөн амжилтад хүрээгүй. Харин исламын шашны хэт нэг чиг шугамыг баримтлагчдын мөргөлдөөн нөхцөл байдлыг улам дордуулж улмаар Засгийн газрын тэргүүн огцрохоор болов.

Улс орон даяар газар авсан эмх замбараагүй байдлыг намжаахын тулд Ливаны Ерөнхий сайд Саад Харири огцорно гэдгээ телевизээр дамжуулан ард иргэдэд мэдэгджээ. Хариригийн мэдэгдлээс хэдхэн цагийн өмнө нийслэл Бейрут хотод зам талбайг хааж, майхан барьж жагсаал хийж байсан олон зуун залуу руу исламын шийт урсгалын бүлгийг дэмжигчид дайрснаар нөхцөл байдал улам хурцадсан.

 

Тэд жагсагчдын барьсан майханг шатааж, жагсаалд нэгдсэн хүмүүсийг зодож халдсан байна. Зарим нь эвслийн Засгийн газрын хүчин Хезболла болон шийт урсгалын улс төрийн нам Амалыг дэмжин орилж байжээ. Жагсагчдын ширүүн мөрөлдөөнийг нулимс асгаруулагчаар намжаасан боловч өдрийн төгсгөлд Бейрутын гудамж дахин хүмүүсээр дүүрчээ. Гэхдээ энэ удаад тэд Засгийн газрыг эсэргүүцэн 10 гаруй хоног жагссаныхаа үр дүнг харж Ерөнхий сайдын огцрох болсон тухай мэдээг тэмдэглэн баярласан байна.

 

 

Гэсэн ч өр зээлийн хэмжээ дээд цэгтээ тулсан энэ үед улс төрийн тогтворгүй байдал үүссэнээр асуудал шийдэгдэх бус эсрэгээрээ хүнд цохилт болж дордоно гэж Ерөнхий сайдыг дэмжигчид уриалжээ.

 

 

Эх сурвалж: www.theguardian.com, www.bbc.com

---