ТЕГ-ын дарга асан Б.Хурц, УЕП-ын орлогч асан Г.Эрдэнэбат нарын өмгөөлөгч болох Монголын өмгөөлөгчдийн холбооны гишүүн Б.Мэргэн, Ц.Туяа, Э.Хашчулуун нар өнөөдөр мэдээлэл хийлээ.

Шүүгчдэгч Б.Хурцын өмгөөлөгч Б.Мэргэн:

-Бид Б.Содномдаржаа, Т.Чимгээ нарыг эрүүдэн шүүсэн гэх хэрэгт холбогдсон есөн шүүгчдэгчдийн өмгөөлөгчдийн төлөөлөл байна. Хуульчийн мэргэжлийн хариуцлагын хуульд заасны дагуу шалгагдаж буй хэргийн талаар өмгөөлөгчид зарим нэг мэдээллийг өгөх эрхтэй байдаг. Мөн хэргийн талаар эрс худлаа мэдээллийг нөгөө талаас явуулсан тохиолдолд мөн хариу няцаалт өгөх эрхтэй байдгийн дагуу энэхүү мэдээллийг өгч байна.

Бусдад эрүү шүүлт тулган эрүүгийн хэрэг хүлээлгэсэн гэх хэргийг Төв аймаг дахь эрүүгийн хэргийн анхан шатны шүүхээс нэмэлт мөрдөн байцаалтад буцаах шийдвэрийг анх гаргаж байсан. Гэвч уг хэргийг прокурорын эсэргүүцлийн дагуу дахин хэлэлцээд “Байгаа материалынх нь хүрээнд шийд” гэдэг шийдвэрийг гаргасан. Тиймээс бид Монгол Улсын Ерөнхийлөгч Х.Баттулгад С.Зориг агсны амь насыг хөнөөсөн хэргийн 36 хавтаст хэргийг бүхэлд нь нууцаас гаргаж өгөөч гэдэг хүсэлтээ албан ёсоор гаргаж байна.

С.Зориг агсны амь насыг хөнөөсөн хэргийн 36 хавтаст хэрэгт 1500 орчин хуудас материал байгаа. Бид уг хавтаст хэрэгтэй танилцаж хийсэн тэмдэглэлээ гарахдаа хураалгаж байгаа нь хэргийг өмгөөлөхөд төвөгтэй байдлыг үүсгэж байгаа. Бид хэргийн нууцтай холбоотой мэдээллийг огт гадагш нь гаргаагүй. Гэтэл зарим улс төрчид зориудаар уг хавтаст хэргийн мэдээллийг дэлгэж байна. Хэрвээ хавтаст хэргийг бүхэлд нь ил болговол одоо бий болоод байгаа нөхцөл байдал эсрэгээрээ болно. Эрүү шүүлт тулгасан гэх 26 минутын бичлэгийг дэлгээд байгаа хэрнээ бусад зургаан өдрийн бичлэгийг дэлгэхгүй байгаа.

Төв аймагт өнгөрсөн намар болсон шүүх хурлын үеэр хэвлэл мэдээллийн байгууллагууд, иргэний нийгмийн байгууллагууд, олон улсын парламентын холбоо хийгээд улс төрчид хүртэл энэ хэргийг нууцаас гаргаач гэдэг хүсэлтээ илэрхийлж байсан. Энэ хэргийг шударгаар шийдвэрлэхийн тулд нууцаас заавал гаргах ёстой.

---