УИХ-ын чуулганы нэгдсэн хуралдаан дээр Засгийн газрын тусгай сангийн тухай хуулийн шинэчилсэн найруулгын төслийг хэлэлцэж байна. Засгийн газрын тусгай сангийн тухай хууль нь 2006 онд батлагдсанаас хойш нийт 52 удаа нэмэлт, өөрчлөлт оржээ. Ингэснээр хуулийн агуулга, зорилго нь алдагдаж, төсвийн хөрөнгийг үр ашиггүй зарцуулах, төсвийн сахилга батыг алдагдуулахад хүргэж байна гэж үзжээ.

Иймд Сангийн яамнаас тус хуулийн шинэчилсэн найруулгын төсөл боловсруулжээ. Шинэчилсэн найруулгын төслийг баталснаар Засгийн газрын тусгай сангуудын давхардал арилж, зарцуулалт нь оновчтой, үр ашигтай, ил тод болж,  хяналт хариуцлагын тогтолцоо сайжирч, төсвийн сахилга батыг сайжруулахад чухал нөлөө үзүүлнэ гэж төсөл санаачлагчид үзэж байна. 

Улмаар Засгийн газрын 29 тусгай сан байгааг 21 болгохоор төсөлд тусгажээ. Тухайлбал, нэг байранд байсан Тариалан эрхлэлтийг дэмжих сан, Жижиг, дунд үйлдвэрлэлийг дэмжих сан, Мал хамгаалах санг нэгтгээд Үйлдвэрлэлийг дэмжих сан байгуулахаар төлөвлөснөө Сангийн сайд мэдэгдэв.

 

---