УИХ-ын ЭЗБХ-ны өнөөдрийн хуралдаанаар Төрөөс мөнгөний бодлогын талаар 2020 онд баримтлах бодлогын үндсэн чиглэлийг хэлэлцэх үеэр УИХ-ын гишүүд Монголбанкны ерөнхийлөгч Н.Баяртсайханаас Монгол Улс яагаад Саарал жагсаалтад орсон талаар асууж, хариултаа авлаа. 

Монголбанкны Ерөнхийлөгч Н.Баяртсайхан: 

-Бид Хар жагсаалтад орохгүйн тулд Саарал жагсаалтад орсон. Энэ бол зөвхөн Монголбанкны ажил биш. Засгийн газар ч ажиллах ёстой. Асар дуулиантайгаар хэргүүдийг шалгаж эхэлдэг. Гэтэл шүүх дээр хэрэг нь шийдэгддэггүй. Энэ бүхэн чинь Саарал жагсаалтад ороход нөлөө үзүүлсэн. Арилжааны банкуудын асуудал Саарал жагсаалтад ороход нөлөөлөөгүй.

Монголд өнөөдөр 13 арилжааны банк үйл ажиллагаа явуулж байгаа. Зарим банк нэгхэн хүний мэдэлд, зарим нь хоёрхон хүний мэдэлд байгаа. Энэ нь өөрөө банкны салбарын эмзэг байдлыг нэмэгдүүлж байна. Тиймээс цаашдаа банкуудыг нээлттэй, олон нийтийн, олон хувьцаа эзэмшигчтэй, харилцан биедээ хяналт тавьдаг болгох хэрэгтэй байгаа хэмээн ярилаа. 

---