Барилга, хот байгуулалтын сайд асан З.Баянсэлэнгэд холбогдох шүүх хурал өнөөдөр болсон.  Шүүх хурал хойшилсон ч түүнийг урьдчилан хорих 461-р ангид хорьжээ. Учир нь сайд асан З.Баянсэлэнгэ өнөөдөр болох шүүх хурлынхаа шүүхээс, шүүгчээс, өмгөөлөгчөөс гурвуулангаас татгалзсан байна. Тиймээс түүнийг 461-р анги руу ачиж шүүх хурлын товыг 11-р сарын 28 хүртэл хойшлуулсан байна. 

Түүнд холбогдох хэрэг жил дамнан үргэлжилж буй. Түүнийг Барилга, хот байгуулалтын сайдаар ажиллаж байхдаа албан тушаалаа урвуулан ашиглаж, "Түрээсийн орон сууц” хөтөлбөрөөс улсад онц их хэмжээний хохирол учруулсан хэрэгт гэх хэрэг үүсгэсэн юм. Тэрээр шүүх, шүүгчээс татгалзаж байгаа шалтгаан дан ганц өнөөдөр биш бөгөөд өнгөрсөн онд СХД-ийн Эрүүгийн хэргийн анхан шатны шүүхэд товлогдсон шүүх хурлын ерөнхий шүүгч Ц.Оюунчимэгээр шүүлгэхээр татгазсан байдаг. Ингэснээр тодорхойгүй хугацаагаар хойшилсон байдаг. 

Харин энэ сарын 1-нд буюу өнөөдрөөс 20 хоногийн өмнө түүний шүүх хурлын харьяалал өөрчлөгдөж Чингэлтэй дүүргийн Эрүүгийн хэргийн анхан шатны шүүхэд товлогдсон ч З.Баянсэлэнгэ өмгөөлөгчийнхөө шүүгч Б.Халиунаас мөн татгалзсан байдаг.

Өөрөөр хэлбэл, З.Баянсэлэнгэ үндсэндээ гурав, дөрвөн удаа шүүгчээс, шүүх бүрэлдэхүүнээс татгалзах шалтгаанаар шүүх хурлаа ийн хойшлуулж байгаа ажээ.

Үнэхээр түүний шаардлагыг хангах шүүгч олдохгүй байна уу, эсвэл шүүгдэгч сайд асан шүүх хурлаа хойшлуулж ямар нэгэн хугацаа хожоод байна уу гэдэг нь асуулт дагуулж байна. 

Сайд асан З.Баянсэлэнгийг Эрүүгийн хуулийн тусгай ангийн 263.2 дахь хэсэгт зааснаар албаны эрх мэдэл буюу албан тушаалын байдлаа урвуулан ашиглаж "Бэрэн групп" ХХК-ийн барьсан "Хангай" хотхоны орон сууцнаас 123 айлын орон сууцыг тендер зарлалгүйгээр худалдан авч, улсын төсөвт 972.4 сая төгрөгийн хохирол учруулсан байж болзошгүй хэмээн үзэж шалгаж байгаа юм.

Анхан шатны болон давж заалдах шатны шүүхээс түүнд төрийн албанд ажиллах эрхийн гурван жилийн хугацаагаар хасч, улсад учруулсан 19 сая төгрөгийг төлүүлэх шийдвэр гаргасан ч Дээд шүүхээс хэргийг мөрдөн байцаалтад буцаасан юм. 

 

 

 

---